魚樂無窮 - 唐牛 2019年10月17日
【魚樂無窮】抽新股自保招數 - 唐牛
新股熱潮已接近水尾，投資者現時入飛抽新股，最緊要揀間有暗盤市場嘅，起碼走鬼都多一個渠道。資料圖片 適中字型 較大字型
特首林鄭月娥公佈上任以來第三份《施政報告》，以佢現時嘅民望，其實講乜做乜都係死，只係俾人鬧得多與少嘅問題。當中最惹火的措施，莫過於放寬首置人士按保計劃的樓價上限，即時的影響係，一心諗住只能買新盤嘅上車客，或會轉移陣地至二手樓，冰封多年的市場或會稍為溶化，所以噚日升得最勁嘅唔係地產股，而係唯一的代理股美聯集團（1200）。
港股有理無理繼續炒，內需股、新經濟股依然係焦點，周二在《理財急Call》節目推介的平安好醫生（1833），埋單都有逾半成升幅，有跟進的戰友，我真係恭喜你呀。
新股乃資金另一個主戰場，昨日上市的莊臣控股（1955）及華營建築（1582），一度炒高1.2倍及1.8倍，前者成交達3.5億股，以街貨1.25億股計，轉手率接近300%。但風光背後卻是屍骸遍野，兩股收市升幅僅得23%及15%，意味炒風越來越短癮。執筆之時，今日上市的新股綠新親水膠體（1084），其暗盤價亦由高位回落50格，在在反映熱潮已接近水尾。為求自保，戰友們現時入飛抽新股，最緊要揀間有暗盤市場嘅，起碼走鬼都多一個渠道呀！
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.entertainment.appledaily.com
