殘爆美聯炒林鄭出招
2019年10月17日
美股隔晚大升，杜指再升上27000點樓上，但港股開市乏力，11點後特首林鄭月娥宣讀《施政報告》，當中重點房地產政策無出辣招，指數喺地產股帶動下回升。香港經濟同樓市緊密掛鈎，現在社會動盪，為政者投鼠忌器，點敢大力打擊樓市，所以今次報告中間落藥，咁樣問題又嚟啦，
樓價會唔會止跌回升呢？
《人權法》限制港股升勢
美股受企業績佳帶動，但美國眾議院通過《香港人權法》，多少帶來政治經濟不明朗因素，加上本地政局未明，所以港股開市未有跟隨美股攀升，只係窄幅波動。其後《施政報告》提出多項房策，包括運用《收回土地條例》和其他適用條例，收回三類約700公頃私人土地作100%公營房屋；收回幾個寮屋區興建公屋；最高九成按揭貸款的樓價上限，由現時400萬元提升至800萬元；最高八成按揭貸款的樓價上限，則會由600萬元提升至1000萬元等。
年初覓地小組提交報告，話中短期無法增加供應，排除好多爭議性措施。現在政府火燒後欄，林鄭急急出招，準備用《土地收回條例》收地，再加其他招數，有點重回梁振英時代搶地味道。雖然林鄭現在先開始亮劍，但現屆政府上任以來，打口水戰已經浪費超過兩年時間，原先增加中的供應已經被消化掉。聽建造業界話，現時有地在手的發展商全部歎慢板，起樓速度有咁慢得咁慢，所以政府用條例收地只係有好過無。
《施政報告》放寬首置人士按揭，措施相信可以幫到部份等上車人士，特別係幫到他們買二手樓。按揭限制影響年輕人上車，聽聞在政府內部已經討論好長時間，但因為樓價一直上升不敢放寬，今次趁樓價回落推出，對上車一族係好消息。不過，放寬按揭只係幫到上車一族，無增加總體供應，仲可能增加需求，對樓價有推波助瀾作用，換一個角度睇，新政策只是分配上有點改善，最終仲係要研究點樣可以增加土地。
無新辣招地產股爆上
林鄭可能怕發表報告後批評聲四起，於是事前傳出不少風聲，措施大抵同傳聞差不多。睇股價最實際，投資者本來要睇清楚有無其他辣招跟尾，當《施政報告》講完房策，沒有特別打壓需求招數，本地地產股就開始造好。恒指收報26664點，升160點；國指收報10532點，漲32點，成交金額823億元。新世界發展(17)升4%，報10.76元，為表現最佳藍籌股；新地(16)升3%，報115.2元；領展(823) 升2.9%，報84.23元，三股升幅位居藍籌股三甲，升幅前九位均為地產股，信置(83)一度升至12.34元，創一個月高位，收升2%；恒地(12)則升2.8%，報38.25元；會德豐(20)亦升1.9%，報46.6元。英國脫歐問題有望解決，刺激長和(001) 造好，股價曾創一個月高位，見73.8元，收升1.5%，報73.35元；高盛列為確信買入名單，長實(1113) 收升2.6%，報53.65元。市傳會宣佈發展三條新鐵路，港鐵(66)上揚，一度升穿20天線(44.4元)，收報44.95元，升2.9%。
除地產股以外，代理股美聯(1200) 急彈14%。過去因為按揭太緊，購買力去了新盤，二手市場不振交投減少，對代理做生意不利，美聯都要靠搶新盤支撐，過去幾年業績變成有賺有蝕不穩定。現在1000萬以下樓宇按揭放鬆，買家可以轉諗二手樓，令美聯成為得益者，所以股價升得比地產股更勁。美聯昨日收報1.13元，較低位0.89元反彈27%，仍然算係三年低位，回彈可謂三年不發市，發市當三年。
美聯喺2018年尾，主席黃建業曾提出以2元作價有限度增持，當時陸羽仁拆局，話增持完成後黃主席控制權加強，失去敵意收購憧憬，股價可能就會乏力。後來計劃完成，股價由高位反覆跌超過一半，殘到差不多回到沙士時期。以現時市盈率14倍，息率2.8厘計，炒作一下林鄭出招亦屬正常。
陸羽仁
金融High Tea - 陸羽仁 舊文
來源 source: http://hdfin.stheadline.com
