中環在線 - 李華華 2019年10月30日
【中環在線】中國飛鶴：冀吸引長線基金 - 李華華
金利豐行政總裁朱李月華 適中字型 較大字型
金利豐（1031）行政總裁、「殼後」朱李月華上年為慶祝同老公朱沃裕結婚35周年，豪請好友齊齊飛往韓國濟州搞party慶祝，成為財金界熱話。點知事隔一年，披露權益居然顯示朱沃裕於上周四（24日）失去咗「配偶權益」嘅身份，唔再持有任何金利豐股份，莫非感情生變？
咁震撼嘅新聞，朱太一聽見即刻同華華澄清話：「我同老公關係好好，一切無變！」佢話，金利豐一向都由佢個人持有，老公一向「零」持股，唔知聯交所點解突然出個咁惹人誤會嘅披露，佢都要了解下。佢強調朱生會繼續擔任金利豐主席兼執董，總之一切不變。
一般嚟講，上市公司控股股東嘅配偶，會因為「配偶權益」被視作共同擁有上市公司嘅持股，並需向聯交所申報披露。查實今次朱生嘅股權有變，或者同金利豐控股公司重組有關。話說朱太原本透過四間公司持有金利豐，但上周四就將控股公司「四合一」，統一由Active Dynamic Limited持股。朱太話，為咗方便申報，一直有計劃咁做，只係之前太忙冇做到，重組唔涉及任何融資計劃，亦冇打算做任何股權轉讓嘅動作。都係嗰句，一切不變！
朱太同老公喺金融界出曬名係恩愛夫妻檔，兩人由美國打拚到香港，齊齊創立金利豐。作風高調嘅朱太一向係金利豐生招牌，但實際背後運籌帷幄嘅軍師卻是朱沃裕。雖然朱太話近排生意淡薄咗啲，但兩夫妻經歷咗咁多，外面就算風大雨大，兩人都打風都打唔甩啦！
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文
來源 source: http://hk.entertainment.appledaily.com
