收市閒情 - 千頌C 2019年10月30日
【收市閒情】與闊太一席話 - 千頌C
現時加入警隊，真係高人一等，至於錢銀方面，就更加唔使講。 資料圖片 適中字型 較大字型
林鄭用咗接近五個月，成功將香港變成「軍政府」。元朗721唔見人？話係安全考慮。行刑式開槍？係電光火石之間，別無選擇。對準清真寺門口射水？咁係要保護清真寺。所以說，現時加入警隊，係高人一等呢，至於錢銀方面，就更加唔使講。
話說有日同位闊太食飯，呢位闊太行走中環多年，出入高級餐廳次數，分分鐘多過我食飯，然後佢語帶欷歔，「家陣食呢啲高級餐廳，有時真係背脊骨落，成日都會見到啲黑警喺度食。」然後佢輕輕一指斜對面，的確有一對食客，睇打扮滲出濃烈女警味，咁當然，佢身上都冇委任證，我哋冇證據證明佢係警察，但女人嘛，直覺就當係。
「你真係成日撞到呀？」然後闊太就話啦，「我夠識班黑警啦，現時日日開OT，個個月出成十萬糧，覺得自己大壓力，人有錢啦，咁梗係食好嘢啦。仲有呀，你估佢哋唔驚飲『凍撚茶』呀？」
當你以為你交嘅稅，除咗係請自己食催淚彈，畀班警察打傳媒、打女人，打阿婆外，其實佢哋仲拎去食二三千蚊一位嘅Omakase、換新波鞋、換新電話……Sorry，唔係愛國就要用的華為，而係iPhone。
我又講多個故事……有一日，喺警總附近茶記食飯，旁邊坐住三位警察，商討緊要事——移民。講到咁上下，話題一轉就去申請宿舍，然後有一句說話，令我非常深刻：「3000幾蚊一個月，星期六日咪當去度假囉，打機又好做咩都好，過兩年悶唔鍾意咪畀返佢囉，又冇話一定要長住。」
是咁的，據3月警務處公佈2019/20年度預算，預算開支去到207億元，按年增3.9%，其中最主要開支用作維持社會治安，預計相關開支涉及100.6億元。不過由於今年OT錢大增，唔知會唔會好似2014年雨傘咁追加撥款啦，當年一加就加咗2億。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.entertainment.appledaily.com
