半年前青冰曾在本欄提過五谷磨房（1837），當日就著百事入股25%而作分析，時日過去，表現乏善足陳，不過青冰亦不時跟進此股
的動向，自入股之後，消息及通告少之又少，九月底宣佈委任百事大中華管理層為非執董，其他並無特別，但近日出現的一個異動，或是醞釀緊大動作。
青冰留意到佢近日的CCASS有大手變動，有9.29億股由非CCASS轉至CCASS內，並由花旗銀行持有，而這個數量，佔42.38%的股本，翻查披露易便知道，只有大股東有咁多貨。大股東持貨，並不一定要放在CCASS內的，情況就如你白表申請了一隻新股，如果唔想沽，係無需要存進銀行或證券行內，要沽就當然要放入CCASS啦，不過CCASS有咁大手的變動，都仲有兩個好截然不同的演繹，第一當然就是賣盤啦，第二個情況在股仔常發生，每當有大貨射入CCASS，斬倉就隨之而發生，好大機會是因押股但無力補倉，畀證券行斬倉。
變動在上星期發生，至今仍未見斬倉，似乎安全喎，再睇嚇五谷磨房的上市日期，是2018年12月12日，即係話過了一年，程序上可以賣盤了。作為百事在中國的首個策略性投資，雖然老細在股東會上強調，百事不會參與營運但會緊密合作，但青冰總係覺得，日後係會收歸百事旗下，加上CCASS這個大手變動，實在值得憧憬。
再睇返去年7月3日至12日，CCASS亦同樣有異動，約4億股由非CCASS轉至CCASS內，而7月26日就正式公佈，幾位基石投資者，以1.80元出售共5.66億股予百事，佔25.8%股本，由射貨到做嘢，大概兩、三星期，如果今次大股東射貨係為賣盤，甚有機會在農曆新年前便成事，事實是否如此，拭目以待吧。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.entertainment.appledaily.com
