自反送中運動開始，經常被指新聞報道偏頗嘅TVB，成為頭號狙擊對象之一，更有網民發起抵制廣告商運動，一落廣告即刻喺fb負評。唔少TVB客仔聞之色變，部份更加喺fb公開
割席，贏得大量網民好評。不過有口痕友同華華講，有間公司割完席、轉頭又縫番好。
講緊嘅係本地券商耀才（1428）。話說佢舊年11月喺fb出post，寫到明「本公司與TVB的廣告合約已經完結，沒有計劃在TVB繼續落廣告」。個post仲有過萬「like」，有散戶仲揚言「永不轉戶」、「呢個post肯定比TVB嘅廣告有效。」
正當大家以為耀才廣告唔會再喺TVB出現時，轉個頭呢間證券行竟然落咗套賀年廣告，耀才主席葉茂林同寶貝女葉頴恩（Jacquelyn）聯同一眾高層一齊同大家拜早年。
11月話冇計劃喺TVB落廣告，轉個頭湯家驊式轉身，耀才行政總裁許繹彬（Edmond）就解釋話生意難做，呢排新股市場好番啲，想谷嚇宣傳咁話。佢仲話喺唔同渠道都有落廣告，唔只係TVB，「大家都要搵兩餐」。Edmond強調落廣告無受到壓力，「只係想造大個餅」。至於如果網民一面倒負評，會唔會抽起廣告？Edmond就話要睇情況。
抵制活動講到明，如果今年再見到廣告商喺TVB出現，會立即列入「永久抵制名單」，耀才可能要諗計點樣拆解潛在危機。
李華華
mailto:LiWaWa@AppleDaily.com
中環在線 - 李華華 舊文
來源 source: http://hk.entertainment.appledaily.com
