【大茶飯】冇得去旅行 旅遊股當災（青冰）
【大茶飯】冇得去旅行 旅遊股當災（青冰）
疫情對兩大OTA皆有大打擊，從股價已經睇到。更多
日本肺炎疫情愈趨嚴重，宣佈取消已發及暫停新發入境簽證，地區包括中韓港澳，這個消息跟美股暴升暴跌同樣震撼，須知道香港人去日本猶如返鄉下嘛，這個措施初步去到3
月底，但作為旅客，有咁大不明朗因素，現時都不敢籌劃未來幾個月之旅行。
青冰原已計劃月底至復活節其間去歐遊，1月已經訂好機票、酒店及火車票，上月當疫情在中港爆發時，還擔心屆時外地會拒絕香港旅客入境，已經拎定份旅遊保險出來刨條款細則，不過近期的發展就是歐美同樣大爆發，由擔心去唔到，變成擔心唔去有冇得claim。最後發現航空公司已將航班大量縮減，青冰程機票可以借勢取消及回水，酒店方面雖幾經周旋，但最後仍可爭取到免費取消，現時只係蝕火車票，真係要還神喇。
今次訂酒店，主要都係用Booking.com（美股BKNG），要幾經周旋，係因為訂房時揀了冇得取消嗰隻，現時疫情爆發，旅客冇得去，酒店都好兩難，放畀你係人情唔放亦是道理，而跟Booking.com周旋時，青冰特別強調，喂睇新聞你對家Expedia（美股EXPE）因疫情而畀客人免費取消喎，何解你哋冇咁嘅安排呢？最後由佢哋出面，酒店終於放人，青冰相信佢哋應是向酒店提出免收傭金，成全此事。
網上旅遊代理 跌幅兩成起錶
唔知戰友是否知道，香港人普遍用的Online Travel Agency（OTA），其實都係來自以上兩大品牌，Booking.com旗下除了自己，仲有Priceline、Agoda及Hotelscombined等等，而對手Expedia，旗下就有hotels.com、Orbitz、Trivago及Tripadvisor等等，青冰看過某些研究報告，指兩大市佔率近八成，其實兩者的發展，都係靠不斷併購同業而壯大，至於其他OTA，Airbnb就走民宿路線，而內地知名的攜程（美股TCOM），始終目標客戶是內地人，還未能跟兩大相提並論。大家有冇留意到，兩大手上都有格價網站，及看似較中立的旅遊資訊網，再回想嚇搵酒店時，是否最終都去返自己友的酒店網呢？青冰往日沒太在意，戰友可以分享嚇。
疫情對兩大OTA皆有大打擊，從股價已經睇到，截至上周五收市，BKNG由情人節起已累跌兩成，EXPE同期跌了26%，不過比那些郵輪公司要跌一半，兩成真係小兒科了，而量度TCOM的跌幅，應該從封武漢開始計，累跌24%，竟比EXPE更少啊。
如果疫情在上半年大致受控，相信全球的旅客，都會將抑壓了很久的旅遊欲望，鎖定在第四季，屆時訂房應該要鬥搶喇。
青冰
http://www.fb.com/chingbing888
本欄逢周二刊出
大茶飯 - 青冰 舊文
來源 source: http://hk.finance.yahoo.com
