俄羅斯並非石油輸出國組織（OPEC）一員，但俄羅斯產油量全球排二、三之間。經
常會聽到OPEC話要穩定油價，如何穩定？就係產油國聯合行動，包括控制定價、產量等，其實就係行卡特爾（cartel）。俄羅斯產油量舉足輕重，要控場冇佢唔掂，所以又有所謂OPEC+，即OPEC連同俄羅斯一齊合作。而就在上周五，沙地同俄羅斯就減產協議上反枱，係星期一全球金融市場大動盪之故。
話沙地同俄羅斯反枱，並非單單因OPEC+無法達成協議。沙地阿美宣佈20年來最大劈價，4月所有賣去亞洲的石油減4-6蚊（美元/桶，下同），賣去美國的減7蚊，賣去歐洲西北部同地中海地區的減6-8蚊。國際油價慣常以幾隻油做定價基準，例如WTI、Brent，然後各產油國再按本國石油質量調整價格，歐洲油係用Brent。沙地阿美宣佈減價時，其阿拉伯輕質原油比Brent平10.25蚊，俄羅斯烏拉爾原油則只比Brent平2蚊。歐盟係相當依賴俄羅斯能源，沙地阿美劈價，將衝擊俄羅斯石油出口。沙地亦向市場放風會增產，劈價、增產齊做，亦即宣示要玩能源。
打石油戰＝全球大蕭條
下星期OPEC+會再召開能源會議，沙地此舉目的在畀個下馬威俄羅斯，要俄羅斯埋枱再傾，但俄羅斯受唔受難講。產油國可能爆發價格戰，本已受肺炎疫情影響的經濟，無疑如被踩多腳。又喺上星期，聯儲局已緊急減息，市場未出發先興奮，已賭緊FED幾時再QE。事關聯邦基金利率現只有1.25厘，冇幾多水位可減。由5%減到1%會刺激經濟，由1.75%當佢減到0.25%，市場隨時當你冇到。冇用的話減唔夠幾次就要QE。
從債券市場睇到，市場係興奮而非恐慌。執筆時美國10年債息曾跌到0.3469%，創歷史新低。有過金融海嘯的經歷，眾人都知道央行能做的貨幣政策冇幾多，一QE債價將會爆上，梗係飲咗頭啖湯先。另一方面，上星期美元隔夜逆回購連續兩日求過於供，顯示美元已略呈流動性緊張跡象，國債係流動性最好的抵押品，也自然要爭。
理性看待，現時石油戰不能開打，否則等同宣告全球步向大蕭條。可是在各自利益盤算下，世事往往不會理性，否則也唔會有世界大戰。馬克思的歷史唯物辯證認為，世事會循正、反、合形式推進。我們竭力避免重蹈大蕭條覆轍，然而當下情況係向大蕭條完美地推進，康德拉季耶夫對經濟周期的推演，也似乎在應驗中。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.entertainment.appledaily.com
