【智取大市】股神視角下之美股 - 晉佳
超長線而言，股神畢菲特依然覺得押注美國絕無問題，理念係美國係一個不斷進步嘅國家。 資料圖片
股神畢菲特喺個冷冰冰嘅吉場裏面開巴郡股東會，仍有唔少重點值得咀嚼一番。
對於著重長線投資回報嘅股神嚟講，喺近年高估值、低回報的年代，確實唔係佢出手嘅好時機，
今年面對疫情，巴郡4月更套現逾60億美金。單睇今年，股神似乎唔樂觀，佢認為疫情已改變經濟結構，加上疫情幾時消退、會否二次施展襲擊，將成為極不明朗因素。
反彈浪當中，資金換馬捨弱取強，但不見得稍後會減持現金、增持股票，皆因不明朗環境會讓市場感到厭惡。股神選擇沽出回報能力被破壞嘅航空股，同時未搵到「有趣的投資」，係追求高回報嘅長線投資者寫照。
不過，超長線而言，股神依然覺得押注美國絕無問題，理念係美國始終係一個不斷進步嘅國家，疫情未打垮佢嘅根本實力。你今日以高市值、低回報嘅價格去投資一件一直進步嘅項目，回報不斷提升之下，最後你都能夠贏。你買完跌，只代表買得貴咗、未來賺得少咗。
今年中美為救市，大幅增加貨幣供應，打嗎啡預咗低效益，但中國情況尤為嚴重。內銀寧願借「經營貸」畀人炒樓，都唔想借錢畀人做生意，象徵中國富人喺危機中只願安全地成為尋租者，最終限制經濟復蘇能力。中國股市低估值而欠回報潛力，自然未獲得股神垂青，提都懶得提。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com
