【利字當頭】太理想易全球攬炒 - 利世民
理想主義最大嘅問題係，假如個理想係錯嘅話，咁就全世界攬炒。 互聯網圖片
「唔會影響香港國際金融中心地位。唔擔心。信政府。」Nancies 話，國安大法好，最緊要係拉曬啲搞事嘅人。
我唔知Nancies對法治有幾多認識，但我就一向都係咁同牛頭角
順嫂解釋：「法治，就係邊個同政府打官司，都有可能贏。」正如我經常話：「政治自由，其實就係有權向政府說不。」連說不都冇自由，咁仲係咪一個自由嘅地方？
自從第一次人大常委釋法，「同政府打官司有可能贏」嘅機會其實越嚟越渺茫；當人大常委說了算，就連打都唔使打就已經話你輸咗。點解要同政府打官司？有時候，政府都可以同私人企業有合約糾紛，呢啲情況下，司法制度獨立公正，係大家可以信任依賴嘅最後制度底線。
「你講嘅係商業糾紛，唔受影響㗎。國安大法講緊係啲好特殊嘅情況。」真係？條文寫到咁鬆，冇人知自己幾時會俾人話係顛覆國家。當黨國不分，官商又不分，你點知幾時會得罪咗國家？競爭，就梗係有時我贏，有時佢輸，但如果黨國機關一定要戰無不勝，咁嘅遊戲規則，你玩埋佢啦。
「國家玩曬，咪仲好！競爭，根本就係浪費資源。」唔知大家有冇聽過咩叫理想主義？理想主義，係話有啲人認為個世界得一個最好嘅模式，根本唔需要有其他可能性；只要相信咩係最好，就全世界跟著去做就得。
理想主義最大嘅問題係，假如個理想係錯嘅話，咁就全世界攬炒。相對於理想主義，係一個必然唔完美，最好亦只不過係一個可以不斷自我修正嘅社會，亦即係自由市場嘅本質。假如相信世界係完美，根本就唔需要市場，唔需要金融，唔需要合約精神，唔需要獨立司法制度，唔需要法治，唔需要權力制衡。完美嘅烏托邦裏面，或者連政府都唔需要。好可惜，烏托邦係唔存在㗎！
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://s.nextmedia.com
