【金手指】波叔「唔掂」 耐人尋味 - 孫柏文
「舖王」鄧成波（左）及兒子鄧耀昇。 資料圖片
噚日睇《蘋果》訪問「舖王」鄧成波（波叔）。一睇，孫柏文眼都凸。記得2008年尾，蕭若元搞緊網台，叫咗好多𡃁仔𡃁妹逐個去見佢。傾嚇有冇得為佢效力，其中包括我同李兆富。當日我哋兩個上燒山個offic
e，佢個仔蕭定一都喺到。嗰排金融海嘯，當然有傾埋市場情況，蕭定一就話佢哋間上市公司幫襯開啲銀行，都收水。之後我哋就走，我問李兆富：「蕭定一係咪啱啱同兩個財經傳媒工作者爆出，佢間上市公司被call loan？」李兆富就答：「你見唔到蕭定一一講完，蕭若元塊面即刻燶曬咩？」故事教訓，債仔係永遠都唔可以認被call loan、手緊等等。
所以，當我見到鄧成波非常坦誠咁認，仲要自我踩多兩腳，話不但銀行借爆，仲要財仔借到30厘時，我真係諗唔通。玩緊乜？耐人尋味啊。
最初，我呢啲低級財演喺度諗，佢係專登塑造一個「唔掂」嘅形象，等啲人知佢啲嘢乜都賣，仲要會係筍價。諗唔通下，我就問一位玩財技、借貸、風險管理出神入化嘅朋友。佢話，無啦啦咁講，應該係想阻止自己啲仔女做傻事。可能係仔女情竇初開，老人家驚佢俾人呃。所以話自己好唔掂，打發走啲「搵食」嘅人。有冇理？我只係知道，報紙報道，絕對準確。任何猜測，都係錯的。謝謝。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://s.nextmedia.com
