【金手指】Get Well Soon Webb! - 孫柏文
David Webb喺佢網站披露佢有病嘅事，令人好傷感，希望佢大步檻過，亦期待佢再重出江湖！ 資料圖片
孫柏文噚日睇到David Webb喺佢網站披露佢有病嘅事，真係覺得好傷感。不但因為佢係個勁人，仲要係香港成為香港，一路散發
嗰種世界領先大都會嘅浪漫，就係歷年來都有Webb兄呢種奇人異士，自發咁選擇聚喺呢個福地。
我每次睇X Men嘅電影，雖然每個角色都有佢哋嚴重嘅性格缺陷，甚至被世人排擠。不過最後搵到X Men學院落腳後，成為充滿色彩嘅故事主角。而以前嘅香港，其中一個最重要嘅特質，就係一班來只五湖四海，鬥心極強嘅人，聚喺獅子山下。
我哋就係真人版嘅X Men學院。希望佢大步檻過，亦期待佢再重出江湖！Get Well Soon David Webb！
2020年一半都未過，不過好多大家都覺得「永恒不變」嘅定律，都喺今年出現劇變。如果你話下半年真係有兩個有核武嘅國家開拖，對市場參與者已唔係黑天鵝。當英國會考慮畀BNO持有人居英權時，城中核爆會幾出奇呢？咁如果市場都開始有咁嚴重嘅預期時，澳門收番幾個賭牌，又可以會幾震撼呢？發鈔銀行冇得再喺香港做生意，又會幾咁奇？保持最高機動性，隨時能走位。各位，過到呢關就真係會有大把世界玩了。期待。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://s.nextmedia.com
