關志康 - 假如你一注獨得6000萬 | 神耆商機
近期閒談間的熱話，均離不開六合彩頭獎的幸運兒，以一注10元捧走6923萬元獎金；另有報道指中獎人為警察，並已即時申請放假慶祝。有朋友議論：「如果係我，我好可能『掟錢』辭工，亦一定忍唔住要同人分享，請朋友食大餐、派下利是，一起開心
下、不亦樂乎！人哋眼紅係人哋嘅事，自己開心最緊要！」
有位有錢人卻不以為然：「『悶聲發大財，槍打出頭鳥』。我覺得最好低調行事，繼續返工扮無事。始終會有人小器，或會製造麻煩。你想唔想成為KK園目標？而且6000幾萬話少唔少，但也不算很多。買層靚啲嘅樓都無三分一啦。」早年有美國經濟學家研究，中頭獎者約10年後的情況，發現他們只存下獎金的16%。此外，英國有一對夫妻在2005年中了頭獎，贏得約1690萬港元，當時二人馬上買豪宅，並辭工去旅行，最終在短短8年內將獎金「清零」，及後更破產和離婚。現實中這類「樂極生悲」的例子，其實為數不少。
另一位長者認同：「最好肯定是無人知你（咁）有錢。尤其是忽然富貴，很多朋友就會『浮出來』，約你飲茶敍舊、介紹投資『騙局』，更甚求你借錢幫忙。赴約就浪費自己時間，不應邀就被人話你囂張。然而，真朋友不想被以為攀附，反而大家疏遠了，多可惜。」他續反問：「近日有幸運兒因為唔識電腦、無工作能力，而被KK園釋放出來；如果佢係有錢仔，下場會唔會咁好彩？」
真正有錢的人大都較低調，甚至刻意「扮窮」。美國有調查指，有89%的受訪有錢人並不會炫耀財富，其在心理學中被稱為「counter signaling」，即「聰明地透過低調樸素來炫耀」。有富豪說：「在擁有很多可以炫耀的東西後，就不能炫耀了，因為我比任何人都清楚，我的炫耀會讓對方感到憂鬱，並產生相對剝奪感，讓他們感到自己更加窮困。」
健康教育基金會主席
關志康
神耆商機 - 關志康 舊文
本文作轉載及備份之用 來源 source: http://www.stheadline.com
