金融High Tea——預謀式殺倉
2013年4月17日
■自推出新一輪辣招後，二手住宅樓價已從高位下跌約5%，至於本地地產股就逆市靠穩。
這兩日政經事故似乎特別多，美國波士頓馬拉松發生連環爆炸，金價則連環爆煲，拖累大宗商品市場大幅下滑，貴金屬、能源及原材料相關股份跌到七個一皮。美股大插，標普指數創了全年最大跌幅。
金價帶動商品跌，連近日強勢的美股都拖跌埋。跌得咁凶險，搞到連商品大王羅傑斯都話唔敢買金博反彈。通常呢啲大起大落的市況，大戶殺完好友就會殺淡友，正式係高手過招，今次係咪咁樣，睇到五月左右就會揭盅嘞。
受外圍拖累，恒指低開後跌幅逐步擴大至300點，內地午後反彈，上證綜指收市由跌倒升12點至2195點。恒指亦步亦趨一度倒升40點。內地收市後恒指便失去支撐，收市跌101點，報21672點，國企指數跌幅較細，跌14點，造10427點。大市成交增加至628億。
短暫平倉食跌浪
港股跌幅無預期咁大，最直接解釋係之前已經跌咗，中環茶友就形容，呢個係預謀式跌市，由於大戶沽空在前，在壞消息爆發時就平倉，推番高指數。由於大市成交淡靜，只有用呢個方法，先至可以食盡跌浪。
黃金係咁跌，原因一大籮，茶友講笑話，上個星期北韓肥仔金揚言射導彈，仲用架車拖出拖入，做戲七情上面，可能佢諗住打親仗黃金實升，係金市入重貨，點知俾美國佬發現，於是用有形之手質低個金市，咁就唔使開火都打到肥仔金內傷。茶友呢個講雖然想像力好豐富，但都無人敢排除，因為恐怖大亨未死前，都傳過借住地緣政治恐慌係金融市場搵真銀，美國佬中過招，或者會提高警覺，肥仔金五行欠打，但呢兩日忽然靜晒，茶友笑言，唔通佢要忙住撲水補倉。
金彈炸北韓的笑話講完，茶友講到後市點睇，佢話好明顯大戶係金市，股市上下其手，擺明係搵着數，正因為一切照住劇本進行，昨日港股唔係跌得咁恐慌，低開後逐步回升，反映大戶有胡就食吓先，平一平手頭部份淡倉。
地產股算硬淨
早排華資大戶入市回購，推高地產股，陸羽仁話想搭順風車，最好都係等下先，昨日幾隻華資地產股都逆市企穩，顯示有不少散戶真係等跌市入貨博反彈。本地地產股靠穩，長實(001)、新地(016)及恒地(012)都逆市升約1%。
地產人士認為，雖然本港樓市在政府出招後有所緩和，惟樓價升幅仍與市民收入脫節，遠遠未達合適水平，目前樓市風險仍然高企，如風險加劇，不排除進一步收緊，例如上調按揭保費、縮短按揭年期，及因應物業種類而拒承造按保等措施。
政府推出新一輪的樓市措施後，二手住宅樓價已從高位下跌約5%，戴德梁行香港董事總經理陶汝鴻預期全年樓價跌幅約一成，有發展商為個別樓盤提供優惠及回贈變相減價。他預期住宅及其他各類物業成交轉淡，今季買賣將由上季的約2.5萬宗下跌至1.8萬宗。
地產股堅挺同港股相對穩定，唔排除係大戶先行食胡補倉所致，補完倉之後可能又唔同樣。
陸羽仁
上一頁 下一頁
金融High Tea 舊文
