飲奶易哽親
2013年11月27日
新股近日爭掛牌，夾住內地放寬一孩政策概念掛牌的原生態牧業(1431) ，首天卻以破底告終，收報2.6元，較招股價2.7元低3.7%，雖然每手叫做細細注輸100元，但都接近6%，加上中籤率高，捧場客都幾唔盞鬼。
乳業新股似乎唔易玩，月前掛牌的輝山乳業(6863) 都係破底再炒。原生態招股時一度吹話好有概念，但截飛就走咗樣，超額唔係咁多，結果真係飲奶哽親，掛牌全日最高見2.71元，但大部份時間均潛水，最低見過2.54元，家捧場客當然希望好似輝山咁有後福啦，至於願望能否成真，要留意呢兩日可唔可以上番水面嘞。
原生態捧場客損手
其實，原生態如果揀早啲出世，或者食一孩概念食得應啲。呢兩日個市已去到有少少滯住滯住，人行就算有逆回購，個市都要跌3點，收報23681點，國企指數仲跌咗85點，收報11302點。
今個星期係零售股公佈業績的高峰期，不過狀況初步睇嚟唔係咁靚仔，好似周初公佈的包浩斯(483) ，就算盈利反彈，都畀人狂插。
另一隻LOCCITANE(973) 仲衰，業績受日圓大跌打擊，半年純利跌六成。該股曾經係散戶愛股，可惜公司主要市場日本匯價大跌，帶來雙重打擊，既影響同店銷售，同時收入受匯兌影響下降。日本首相安倍想借「三支箭」推低匯價、政府增支日經濟轉型來提振疲弱逾二十年的經濟，可惜至今除了搞低日圓外，暫時未見到三支箭有乜料到。如果日圓續跌，LOCCITANE固然難好，萬一其他兩支箭失敗，咁就真係多得豪賭一舖的安倍唔少嘞。
現時零售商普遍面對成本上升，生意增長放緩兩面夾擊。澳洲會計師公會的調查發現，大部份香港小型企業預期，明年業務會出現負增長，為該機構五年前起進行有關調查以來首次。
公會在9月期間，訪問了314間企業，有61%受訪者認為，過去一年受成本上漲影響，部份認為成本上升和租金增加，會阻礙明年業務增長。對比新加坡和印尼等5個地區有受訪者，香港企業的信心最低。
咁環境下，股民揸住零售股，必須打醒精神，最緊要留意佢哋有無獨特賣點，係咪有將成本轉嫁的能力。
長和賣樓等上主菜
新盤近日陸續吸客，今日截飛的一個樓盤，已有二千幾個登記，發展商以平價包裝兼力谷宣傳，看來已初步奏效。係發展商年尾散貨浪潮下，有報道話長和在最近一周內兩度出售香港豪宅，兩個單位都位於山頂，一共套現近12.8億元。其中一所物業更創了近三年來本地住宅交易價新高。
有熟悉樓市的中環茶友留意到，長和一貫賣樓採取貨如輪轉策略，往往係最先出擊份子，今次散貨潮，長和有一、兩個大盤仲等緊賣樓紙，以集團一向醒目作風，與其被動等候東風，不如變招出咗可以賣嘅高價貨，鎖住部份購買力先，如果年底前趕得及開大盤，咁咪食多「浸」，賣咗嘅豪宅就當係前菜囉，否則呢幾件貨咪當係打底，點都叫做無浪費呢一輪出貨機會，所以今個新盤潮，對長和系嚟講，真正的大茶飯應該仲未上菜呀！
陸羽仁
金融High Tea 舊文
