高手造市
2014/1/22 上午 09:50:45
網誌分類: 經濟
早前有單法庭新聞，有個前持牌中介人蔡斌，前年被裁定操控指數期貨擬定開市價罪成，證監會昨取得高院頒令蔡斌退款，他須向涉案期指交易對手賠償，涉及交易對手約500人，蔡氏須賠總額約1,368萬元。網友twohitsix問起:「1. 期指AO (開市前議價時段)點解會造到市? 大量AO買盤理應只會推高而非壓低AO價吧? 而造市者亦要面對市場風險。2. 如果這是造市, 咁同當年匯豐收市AO $28 有何分別? 點解只捉雞仔唔捉麻鷹?」
呢個玩家非常聰明，睇到議價時段的漏洞。玩法係咁樣，假設昨晚美股杜指跌咗100點，港股應該跟跌，正常跌200至300點就交到功課，好多過夜期指好倉中咗招，會一開市就用市價盤(即不限價)去平倉，有人就用大量超低價盤例如跌500點沽期指，咁就人為將期指開市價比正常再拉低200、300點，咁呢個人沽到比正常低點搵到錢呢?
舉例平常 AO時段得300、400張期指盤，佢就落1000張低500點的沽期指，同時落1200張買市價揸期指盤，由於佢一買一賣倉位咁大，就將開市mark低500點，大家唔好忘記，其實佢自買賣盤對咗之後，還有200張淨好倉在低500點的價位開了，而呢200張的對手是揸咗過夜好倉的人，急於在開市以市價盤沽期指平好倉，就應咗超低價盤。佢揸咗200張比上日收市低500點的好倉，開市後可能5分鐘就回復正常，比開市價反彈200點(仲比上日跌300點)，佢就可以平倉食糊。當年在收市也有議價時段，也出現過懷疑匯豐股票俾人mark價問題，最後收市競價時段就取消咗。
個市有咁多大玩家在玩，你盲中中去炒，好易死。
另外講講美股，昨日大少少牛皮，杜指跌44點，標普500指數升5點。下星期聯儲局召開議息會議，投資者等候當局進一步的貨幣政策。昨日有多家美企公布的季度業績好過市場預期，投資者都無興趣入市。杜指成份股強生、 Travelers業績都好過預期，但股價反而向下。
瑞銀最近統計其全球客戶的資產比例，平均持有現金或等價物佔了30%。瑞銀認為持有這樣高的現金比例，唔係一個好主意，因為利息趕不上通脹速度，客戶手上的資產會逐漸縮水。瑞銀多名分析遂向其客戶提出幾個投資建議，大家不妨參考一下。
先講股票，瑞銀認為，事實上並沒有證據指出股市已起泡或者股價已經脫離了基本面。對美股繼續上漲，仍然樂觀，與美國經濟增長相關的幾個板塊，有非常好的投資機會。至於美國債券，投資者要準備好面對「長達幾年的低回報」。投資者要降低債券風險，其中的一個辦法係嘗試買與債價對沖的對沖基金，因為「它們與債券價格呈低相關或負相關」。
黃金方面，瑞銀建議投資者今年應該減持黃金。理由係「在利率偏低或為負值，以及市場恐慌的時候，黃金的表現會很好。過去一年，利率開始上升，加上新興市場的需求放緩，央行減少購債和聯儲局的緊縮言論，黃金已大幅下跌了。」瑞銀預計投資者今年對黃金熱情會進一步下降，可能會有300至500噸黃金(大約等如年度需求的7%至11%)流出。金價可能將進一步下跌至每安士1050至1150美元。」
有分析從開採成本及行業利潤分析，金價前景可能更加悲觀。統計多家金礦公司的料顯，開採黃金成本大約在400至600美元之，即平均約500美元左右，而現時的金價係1242美元，利潤接近1.5倍。比較其他行業，究竟毛利率是多少？根據2006年美企各行各業的毛利率資料，毛利率最高係金融業，有14%，其他行業能夠有個10%利潤，已經算係不錯啦。相比之下，金礦公司真係賺到笑！如果我們以開採成本最高的每安士600美元計算，然後大方一點，給採礦公司五成利潤。金價應該係幾多錢才合理呢？答案係900美元，即係話，世界按正常方式運作，金價仍有近三成的下跌空間。跌起上嚟，唔講得笑呀。
陸羽仁
回應(1) 我想回應
陸羽仁 BLOG 舊文
