扒冷
2014年01月22日
內地周一爆發水荒，上海同業拆息急抽，中港股市齊齊腳軟。始終過年前夕，中央唔想水緊情況對社會造成太大衝擊，影響民間過年氣氛，人民銀行連出兩招托市。先是再次開水喉進行逆回購操作，金額高達2550億元人仔，同時又透過常備借貸便利操作(SLF)向大型商業銀行提供短期流動性，內地拆息應聲回落。人行維持吊頸都俾佢唞唞氣的策略，放番吓水吊住條命。
人行大規模注資，近期持續弱勢的中資金融股昨日鹹魚翻生，四大國有銀行升勢更見明顯。同時，上證指數重上2000大關，加上A股IPO熱炒，八隻新股於深圳股市集體掛牌，7隻新股全日急升逾45%，中資證券股同步炒上。中信證券(6030) 急漲3.7%，收報18.76元；中國銀河(6881) 走高2.07%，內地新股大上大落，股民唔知賺蝕，不過經紀行就做咗生意先。
證券股走番轉
市場繼續發掘炒作板塊，昨日輪到系統集成股有資金追入，自動系統(771) 爆升43%，收報1.49元，為港股最叻股份；VISION VALUES(862) 炒高27%，收報0.42元。中資金融股雖然叫做有得反彈吓，但力度始終唔多夠，主要係先前熱炒板塊，趁機會唞吓氣。恒指甫開市已收復兩萬三大關。其後最多升211點，但於100天線遇阻，午後大部份時間於兩萬三邊緣徘徊，全日收報23033，升104點；國指算是近期少有地跑贏大市，大漲178點報10218，成交645億元。
我喺網誌講到金屬礦業股可留意，特別係工業用金屬，過去兩三年跌到殘，有止跌回升之象。據《華爾街日報》報道，倫敦金屬交易所的銅庫存由去年6月底至今已下跌一半，專家指庫存大量減少，大部份都輸往中國，反映中國這個全球最大買家即使經濟放緩，對銅的需求仍然奇大。
Investec的礦務分析員Marc Elliott喺接受CNBC訪問時提出，金屬類商品(留意佢講係商品，唔係黃金)下跌風險已經減低咗，相信未來價格有機會好轉，仲認為生產商已經大力提高營運效益，令到生意唔再係一味靠量多取勝。
金屬股有抗跌力
全球商品市場在世紀初出現大牛市，高峰期係美國推出量寬同中國四萬億救市後的水浸期，隨着中國增長放緩同美國部署退市，商品熱開始退潮。不過，數字顯示中國入口銅呢類生產用品無減少，加上商品同世界經濟有密切聯繫，世銀發表最新預測，對今年全球增長較去年樂觀，唔知係咪咁樣引發咗部份投資者係咪可以燒冷灶。
呢類扒冷下注要好有耐性，最好係細細注當係落吓種籽，買咗未必好快賺錢，日後見到佢有異動，先至再大注追入。
銅價去年跌約7%，但近期開始反彈，紐約期銅上周五收報每磅3.3445美元，較去年11月中的3個月低位，累積反彈7.1%。你睇江銅(358) 和中鋁(2600) 這些股票，近幾個月都係橫行上落，大市回落也不是跌得太厲害，有少少尋到底的感覺，呢類股票唔係幾性感，但勝在大件夾抵食囉，?家弱勢股好似中資金融類唔似見咗底，強勢板塊好似濠賭、科網又升得多，冷門股就變咗部份人的另類選擇。
陸羽仁
金融High Tea 舊文
