有利是就要收
2014年01月29日
投資者擔心聯儲局繼續縮減買債規模，美股五連跌，杜指周一再挫41點，連帶港股於期指結算前夕繼續偏軟，就算人民銀行再放水，逆回購1500億元人民幣，仍然撐唔起個市。港股反彈無力，皆因缺乏領頭股份，強勢的科網同濠賭股表現好啲，但其他乏善足陳，雖然個市跌得唔多，但不少大股都創咗一年新低，數數有中電(002) 、太古(019) 、恒隆(101) 、恒基(012) ，仲有最巨型喺中移動(941) 。
喺呢啲市，投資者不宜重錘出擊，小注怡情的話，有人喜歡炒吓大股波幅。炒大股波幅雖然睇落容易，真正都幾考技術，尤其個市級級落，炒波幅走位唔靚，好易就俾佢咬住，輸番轉頭喺一個例子喺中移動，早排國企股炒反彈，佢最高升過去85元，之前佢好多次試80元支持位都唔穿，如喺接近80元撈貨，博三幾個巴仙水位，賺錢唔喺難事。不過，當佢炒4G發牌湧上高位後，個價回番落嚟，走勢就開始唔靚仔，股價碌吓碌吓，碌到一年新低，即喺過去一年買貨者都要輸錢。
炒波幅都講功夫
從牌面睇，中移動市盈率低，派息不俗，公司手頭有大量現金，加上喺行業龍頭，基本條件睇落非常穩陣。家佢咁跌落嚟，主要喺大戶看淡前景，認為國策要打破壟斷，對中移動不利，將來無論接駁費用以至其他收入，都會受到挑戰，市場擔心未來盈利同派息無法維持，搞到股價大平賣，炒上落就要小心愈炒愈低。
同樣情況出現喺中電身上，中電主力業務仍然喺香港，在政府傾向以民生爭取民望下，未來電費升幅必然受壓，其中一個可能喺利潤上限喺專營權屆滿後被調低。為了應付呢個局面，電能實業決定分拆港燈上市套現，股份今日掛牌，中電股價喺港燈掛牌前夕見一年新低，反映市場多咗一隻純本地電力信託，吸走咗部份追求收息的資金。假如日後港燈信託股價撐得住，情況仲好啲，否則都可能拖低埋中電股價。
新地分家少樣煩
至於港燈電力(2638) 掛牌前，在暗盤市場新報5.57元，較招股價5.45元，高2.2%，最高曾造5.65元。港燈國際發售錄得適度超額認購，一手中簽率為100%，呢類以收息為主的工具，加上中簽容易，掛牌若有幾個巴仙利潤，應該可以考慮沽貨收利是過年！
恒指受制於兩萬二阻力，全日收報21960，跌15點；國企指數跌28點報9763，成交金額縮至729.5億元。兩大濠賭股率先反彈後，科網股亦全面止跌回升，其中，龍頭騰訊(700) 旗下微信的新年紅包功能在內地熱爆，刺激騰訊股價重上500元大關，收報503元，與科網概念相關的手機股同樣向好，聯想(992) 去年第四季智能手機出貨量於全球排第四，全年計則排第五位，今年有望躋身三甲，刺激股價抽升6%報10.48元，為昨日升幅最大藍籌。主力為品牌代工的富智康(2038) 走高3.48%報3.87元。科網及手機股均為之前的強勢板塊，家再翻炒，不過好多隻呢類股股價都唔平，睇嚟都喺要炒爆為止。
最後講兩句新地郭氏兄弟終於宣告分家，消息對新地嚟講應該喺中性偏好，因為至少無咗一樣拗撬，但市場焦點仍然喺佢哋的官司點樣。喺新地系股份中，新意網傳過想轉主板，有說差一個董事唔肯簽名唔成事，若然喺咁，唔知分家解決會唔會有幫助呢？
陸羽仁
金融High Tea 舊文
