盲動的綜合
2014/2/6 上午 09:43:17
網誌分類: 經濟
據走勢派話，美股未來幾日好關鍵，如果跌唔到落去，就有機會企穩，結朿呢一浸跌勢。
美股昨日先跌後回穩。標普500指數跌0.5%至1752點。杜指近平手收場，不過形勢有點危，尾市多次挑戰200均線(15479點)，都無功而回，收市15440點，微跌5點。
今年有投票權的費城聯儲銀行行長普羅索(Charles Plosser) 昨日表示，聯儲局應該加速退市步伐，在失業率降至6.5%之前結束量化寬鬆(QE)，之後就可以考慮加息。而亞特蘭大聯儲銀行行長洛克哈特(Dennis Lockhart) 昨日亦發表了類似的講話。
聯儲局的退市態度，給市場一個頗為堅決的印象，大市投資氣氛受壓，投資者轉向更多關注美國實體經濟表現，經濟數據好壞成為主導力量。近排公布的美國以至全世界的經濟數據，普遍唔係好得，尤係製造業PMI指數跌至幾個月新低，就業市場亦唔係好掂，昨日公布的1月ADP私營部門就業人數增加17.5萬人，增幅就遠差過上月的22.7萬人，亦不及市場預期的18.9萬人。加上日圓兌美元朝早升近1美元兌100日圓水平，杜指上日大跌後反彈72點，昨日又再跌過，杜指早段最多跌超超過100點，不過10點半後開始見底。
其後公布的供應管理協會12月服務業指數由上月的53%升至54%，符合市場預期，日圓回軟至101日圓水平，杜指反彈，午後收復所有失地，但在200日均線前就行人止步。美股能唔能夠呢個阻力，有些似樣的反彈，就要睇呢兩日公布的美國就業市場數據，尤其係明日公布的1月美國非農就業報告啦。
股市近排咁弱雞，全球經濟，尤其係中國經濟唔得，令投資者對股市大為恐慌，係一個原因，股市恐懼指標VIX指數幾續幾日企於接近20點高位，已經反映出來。另一個比較直接的原因係資金流向，股市的資金回流到債市中。
有趣的是，今年1月開始的時候，幾乎整個美國投資界都話今年股市繼續走好，而債券和債券基金將會非常唔掂，叫人沽債買股。但唔夠一個月，債券忽然間成為炙手可熱的投資選擇，成為了專家全力推薦的對象。
專家此前的邏輯係聯儲局減少買債，債券的利率自然就會上漲，債券價格就會下跌。但現時的睇法卻係全球經濟增長速度會因聯儲局退市而進一步放緩，又會利率的上升。嘉信理財固定收益策略師瓊斯(Kathy Jones)分析道，「盡管短期債券現在帶給你的回報不足以抵償你承擔的風險，而長期債券則依然波動太過劇烈，但是三年期到五年期的中期債券，現在確實頗有吸引力，尤其是投資等級企業債券，甚至於市政公債。」加上近期的股市表現又非常之弱，在專家眾口一詞叫人沽股買債之下，債券市場又鹹魚翻生。
我就認為，如果市場係盲動的，好多專家只是這種盲動的綜合反映。如今市場對債券看法的迅速變化，正正證明了製定合理的投資組合，並且堅持落去的重要意義。就算債券現在看上去比預想的更有吸引力，亦唔好隨便去增持債券，要睇債券的長遠前景，若美國收水持續，利息向上，債券中長線仍看淡，如今只是大型的反彈而矣，增持債券唯一站得住腳的理由係，你要有一個均衡組合，而你的投資組合原本就債券的比例唔夠，所以要加番啲，而唔係債券好好。
昨日網友牛腩貓咪講買股的第一法則要認錯，我都十分同意，好多人唔認錯，唔分析錯的原因，就會繼續犯錯。若跟市場盲目轉左轉右，好易錯完再錯。
陸羽仁
回應(1) 我想回應
陸羽仁 BLOG 舊文
