魚樂無窮：翠華點解值35倍PE
■筆者認為，翠華PE高但股價唔跌，原因是其市場策略佳所致。資料圖片
新股𤓓味濃鬱，泛亞國際(6128)及暢捷通(1588)分別錄得逾300及200倍超購，可惜股價表現不似預期。有傳唔少對沖基金篤手指抽新股，結果做成人踩人局面，連近期唯一可以搵食嘅渠道都冇埋，真係連個天都唔鍾意港股！
鋒力猛拍得住美斯
翠華(1314)、大家樂(341)、大快活(052)三大餐飲品牌相繼放榜，三股最新PE分別為35、25及14倍，好多人會問，點解翠華PE貴咁多都唔跌，今次業績世界盃可以畀到答案大家。咇！雞聲一響，翠華前鋒立即搶攻，營業額上升36%，其中內地業務收益更爆升74%，上半場連轟入五球，拍得住美斯，相反大家樂及大快活營業額分別僅升9.3%及5.6%，後者內地業務更錄得跌幅，鋒線弱過英格蘭，點踢？進入下半場，因擴張力度加大，翠華員工成本及租金成本分別升37.8%及37.2%，要輸番兩粒畀對手，大家樂同大快活有關成本最多只升一成，後衞尚算稱職唔使失波。最後賽果翠華大炒對手，大家樂及大快活只能悶和零比零！
得中國得天下，好多零售品牌因為水土不服，內地業務停滯不前甚至連年虧損，由於本港業務已見頂，兩個增長引擎死曬火，業績當然年初四咁嘅樣。相反翠華明顯得到強國人歡心，內地店舖比例更由兩成增至三成，乃未來重點所在。荷蘭阿根廷三戰全勝，意大利英格蘭黯然出局，係有原因的。
唐牛
https://www.facebook.com/tongcow88
唐牛
魚樂無窮 - 唐牛 舊文
