老外老細７
2014/6/27 上午 09:44:27
網誌分類: 經濟
時近半年結，港股神奇大彈，美國股亦先插後收復失地。美國第一季度GDP萎縮2.9%，為2009年以來最大跌幅，昨日公佈的5月個人消費支出(PCE) 較上月增長0.2%，低過預期的0.4%，實際服務支出更係下滑了0.2%。多家投行因此下調了美國第二季度經濟增長預期。包括巴克萊銀行及高盛證券等多家大行下調第二季度GDP增長預期，高盛由此前的4%調低至3.5%，巴克萊仲誇，由4%大幅降至只有2.9%。
聯儲局官員繼續玩提早加息的「預期管理」，繼日前費城聯儲行長普羅索(Charles Plosser) 表示或會提早至今年底加息後，昨日輪到里士滿聯儲行長拉克爾(Jeffrey Lacker) 及聖路易士聯儲行長布拉德(James Bullard)發聲。不過，講法比較溫和。拉克爾預計今年年底的通貨膨脹率將達到2%的目標、失業率將低於6%。考慮到目前經濟環境，低利率是合適的。不過，經濟即使小幅增長也可能要加息。
布拉德就更樂觀，他預計2014年底的失業率將降至5.8%，今年第二季經濟增長將重回3%的增長軌道，認為美國經濟狀況比多數人認為的更接近正常。拉克爾及布拉德都表示，聯儲局將在2015年開始上調短期利率，時間比市場預期的明年中才加息提是了幾個月甚至半年，但較普羅索所講的略晚些。不過，他亦暗示，長期利率將低於之前的預期。
聯儲局官員的言論令市場受壓，美股朝早一開就插。不過彈力充足，中午以後動力加強，收市基本上收復失地。杜指收市微跌21點至16846點；標普500指數跌2點，收報1957點；納指跌不足1點至4379點。
MarketWatch首席經濟學家凱爾納(Irwin Kellner) 的分析，又幾值得分享。凱爾納認為雖然名義通貨膨脹率已經達到了2%，但聯儲局對通貨緊縮和失業問題的擔心，註定他們唔會咁快改變既定的政策。
同其他央行一樣，聯儲局天字第一號重視的事情就是失業，對於通貨緊縮的擔心，又遠遠超過通脹。正如經濟學家弗里曼(Milton Friedman)曾經說過，「通脹，歸根結底還是一種貨幣現象。」換言之，只要不大幅度增加貨幣供應，就不會發生通貨膨脹。通縮就完全是另外一回事。當價格下跌，消費者會等待價格更低時才消費。需求下跌，企業唔願增加人手，消費者的消費能力下跌，更唔願消費，這樣就造成惡性循環。而單靠增加貨幣供應，無法解決問題。
聯儲局的通脹率目標是2%，只有到達2%的價格增長速度，才可以確信脆弱的經濟復甦唔會中途夭亡。但目前的價格指數上漲速度其實只有1.6%。所以當局只能夠繼續保持謹慎的姿態，允許通貨膨脹上揚。但通脹對勞動者、儲蓄者及老年人的低收入基層已有影響。他們發現購買力正在縮水，於是盡量減低消費支出，又會遏制通脹。
這意味著，聯儲局目前仍要繼續保持貨幣政策的寬鬆，繼續按部就班地削減其長期債券購買力度，要一直等到經濟增長足夠強勢，消化更多失業人口。在呢個情況出現之前，聯儲局還會想辦法保持低利率，保持有更多的資金進入金融體系內。
另外再續辦公室政治故仔。好多網友想知道勤力超人Jack的命運有無行運超人Peter咁好。論才具Jack的確不如Peter，但Jack的EQ比Peter好，令佢在風起雲湧的美資行迄立不倒，叫Peter如Jack那樣將自己溝女史講俾老細聽Peter做唔出，叫Peter在大老細之前好似啞仔咁亦好難，但Jack做得到，呢啲叫做「將EQ補IQ」，這是Jack的名句，以解釋自己經歷多次裁員潮都唔死的原因。
人係缺乏經驗的動物，年青人、甚至中青年人都唔喜歡聽老人家講經驗，覺得老人家好長氣，覺得「我知啦」，其實佢對人世的變幻所知甚少你05、06、07年在美資行，成日出12個月、24個月雙糧，點會知咁大、咁勁間行，將會年年有指標要裁員? 人在好境中，梗係買架法拉利威吓啦，和同學聚會時揸埋去，仲要專登揀間在路旁有代客泊車的食肆，走的時候在中學追唔到的舊情人面對「捐」入架法拉利度，等夢中情人做教師、唔係、已經做到科主任的老公眼紅吓，呢啲就係人性。
不過Jack「無人性」，或者壓抑咗人性而不自知。佢只係在David升級時升咗一級，做咗部門主管，之後就無升過。普通人日日敲老細門叫老細升自己職，或者一年老細見你一兩次專門做表現評估時，係咁扭老細，但老細David問到Jack對事業前景的期望時，一句「而家OK呀」就收場，David都搭唔到咀。阿Jack搞到個部門年年都爆少少數，唔多，10%左右，明年加佢啲預算，佢又爆少少，表現中上，要彈無得彈，唯有一可彈是美資公司唔鐘意呢啲無Vision(遠見)的人，所以佢睇住人升，甚至有另一個本來係Jack的副手，調咗去另一部門，但在07年都升咗上去。在那個升升升的年代，阿Jack好似一舊石咁。
正如股票咁，有升則有跌，有大升則有大跌，呢個好似係牛頓萬有引力的規律，好多時在職場都應驗。08年後的裁員潮，專殺貴人，第一浸都留吓力，第二浸已經殺入肉，連一些過去視為「明日之星」的人物都殺埋，唔係核心部門就外判，乜都外判，總之係交人頭。美國公司炒人賠錢係特別開支，以後節省係恒常節省，所以殺得好勁，賠得好爽。阿Jack在第一浸炒人時都有同老細講，炒我都唔拘，我都53啦，攞番2年人工食隻肥雞早啲退休都無壞。
世事係咁，你話炒都唔拘，老細就偏唔炒你。公司殺得人多，要有番啲做嘢的人，阿Jack 就係呢種人，殺人殺咗一兩年後，新老細連隔籬部門以前做過啲乜嘢都去問阿Jack，佢又答得出，佢自稱為「活化石」，到而家仲健在，在美資行中十分另類。
到最後唔易答「勤力超人Jack的命運有無行運超人Peter咁好」呢個問題，若阿Jack心底裏對成就的渴求同Peter一樣咁高，咁肯定係Peter好啲。但阿Jack好早就同Peter講，見到的長春藤盟校(Ivy League)畢業的同事，IQ真係爆棚，英文又如母語，我真係唔知佢點解要跟我。Peter的結論係: 你有中國人的智慧嘛，你撈到美資公司，我都撈唔到啦。或者可以用四字隻形容Jack: 韜光養晦。
在那些英雄地，要麼做第一，要麼就係人都知你係「神馬都是浮雲」嗰隻啦。
陸羽仁
回應(3) 我想回應
陸羽仁 BLOG 舊文
