異動空間：簡單方法最易贏
大戶血洗新股，掛牌即日深潛，重鎚新股的戰友，唔少噚日又捱一刀，認真沮喪！早幾日見破位追沽恒指，轉頭又被挾到反艇；小注追細價股博一鋪，一掃就回頭陰跌，低位打靶過兩日又彈；低撈手遊股，點知跌極都有；追炒強勢板塊，上月頁岩氣勢如破竹，本月跌到阿媽唔認得。換邊隻打法都唔掂，反而乜都唔睇，坐死一隻騰訊(700)都有7%回報。應付呢種爛市，最簡單的方法才最有效。
魏力識得個靚女，瞓身工作但從不投資，佢覺得造定期都有風險，積蓄都放在活期存款戶口；寧交雙倍租金住公屋都唔買樓，自住都唔買？「係呀，因為我忍受唔到自己嘅血汗錢，會因為資產貶值而蒸發咗！蝕咗我會癲㗎！」可能你會諗，存錢入銀行一年得幾蚊息，購買力更被通脹持續蠶食，但敢問年初以來，有幾多人炒出炒入的回報能跑贏通脹？每一蚊都係用雙手搵番嚟，有經歷、有回憶，也來得更踏實有價值，我buy。分享呢個故事，絕非叫大家金盤洗手，只是希望各位明白，炒股票不是聽冧把、掃貨、過兩日收錢咁簡單，要花時間研究，投入不會比打工少。一心只想搭順風車的朋友，還請三思。
魏力
http://www.facebook.com/2012jason
魏力
異動空間 - 魏力 舊文
