中環在線：男人貪方便愛嘟Visa
免簽名交易上限增至千元
■市民去超市買少少嘢簽卡時間點都唔夠嘟卡短，所以Visa payWave都有一定捧場客。網上圖片
碌卡shopping唔係女人嘅專利，男人都啱，仲要用最方便嘅碌卡方法。發卡公司Visa經調查後發現，男人較女人鍾意用免簽名嘅Visa payWave，拍一拍張卡就完成交易。不過，財經界嘅男士似乎對錢銀較敏感，謹慎些少，寧願等耐陣，簽卡有保障。
現時全港有6,000間商店提供共1.3萬部Visa payWave終端機，好多超市、戲院、咖啡店都有，通常係小額交易，售貨員先至建議顧客拍卡，每宗交易由上限500元，增至1,000元，𠵱家開始逐步推行。
財經界：簽卡較有保障
就咁拍卡就碌到卡，如果唔小心被人攞咗張卡，卡主好似冇乜保障，Visa方面回應話，如果連續碌咗幾次大額交易，銀行都會有alert，會確認交易係咪真係由持卡人進行。舉例，有銀行會發訊息畀持卡人做確認，以保障持卡人。
雖然Visa話男人較女人鍾意用Visa payWave，貪佢夠方便，但係幾位財經界男士就唔多認同。瑞銀亞洲股票衍生產品銷售部董事總經理于正人認為，簽卡雖然耐咗啲，但較有保障，「況且咁少錢，如果唔係為儲分，咁不如用番八達通。」
投資者學會主席譚紹興更有不愉快經歷，佢試過喺一間連鎖零售店買嘢用payWave埋單時，因機件問題，同一筆消費連續過咗數四次，佢發現後即刻搵信用卡中心，但對方話幫佢唔到，最終佢要跟零售店職員理論，再經兩至三星期處理，先收番錢。
股評人黃德幾認為手機錢包仲方便，都係拍一拍機完成交易，拎手機方便過拎信用卡。「全世界都係去到邊都攞住個電話，拎手機咪仲方便過拎信用卡」。照咁睇，發卡公司要繼續努力開發多啲碌卡方法去照顧唔同顧客群嘞。
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文
