魚樂無窮：世盃概念股滄海遺珠
■世界盃進入倒數，當波友狂掃薯片花生啤酒汽水，主營OK便利店嘅利亞零售同樣受惠。圖為利亞行政總裁楊立彬。資料圖片
有追開本欄嘅戰友都知道，唐牛係六窮月好友，不過此刻卻有少許動搖。噚日粗略睇過各大報章，竟然出現九成唱好奇景。歷史告訴我們，當市場看法一面倒時，反高潮就會出現，希望今次吉人天相吧。
世界盃進入倒數mode，唔少波友已經狂掃薯片花生啤酒汽水，主打零食嘅阿信屋母公司CEC國際(759)單日爆升一成，睇嚟開波前仲有得去。主營OK便利店嘅利亞零售(831)同樣食正條水，趁開車前買定有著數。
先睇基本因素，扣除出售物業收益後，公司去年實際少賺24.8%至1.5億銀，主要受累人工及租金高企。不過，本港零售正處於沙氏以來最差環境，租金肯定有下調空間，利亞業績有望復勇。派息吸引屬另一賣點，去年連特別息共56.8仙，現價息率高達11厘，睇到流曬口水！
利亞網絡潛力待爆發
有玩開淘寶嘅戰友都知道，OK便利店乃其中一個熱門收貨地點，香港、深圳及廣州分店最新分店數目達451間，單計香港亦有335間，網絡規模勁過阿信屋，在物流地位日益提升下，絕對有價有市，一旦獲阿里巴巴或騰訊(700)睇中，真係不得了！事實上，以大股東馮氏家族嘅脈絡，要促成呢單交易唔難。唔信？你初初會諗到文化中國(1060)同中信21(241)會泊到雙馬嘅碼頭嗎？
唯一一個瑕疪，就係成交疏落，皆因近八成股份由大股東及基金揸曬，但貨疏更易舞上，今次世界盃隨時就係催化劑。
唐牛
https://www.facebook.com/tongcow88
【壹錘定音】6月4日早上8點開咪!
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp
唐牛
魚樂無窮 - 唐牛 舊文
