最怕唔信邪
2014年06月04日
大戶夾散戶真係愈夾愈開心，借住美股挑戰新高，加上內地「定向降準」嘅消息，恒指一開就抽高，跟住下晝就跌番，如果散戶以為佢跟住無力掉頭，咁可能就會被大戶再玩一舖，因為三點之後，又會有人發功，指數慢慢夾番高，結果升成209點收市。
炒通縮益咗恒生
陸羽仁喺五窮月提醒大家，小心大戶玩相反。臨近結算個市抽上，我又話唔好以為大戶一過完結算跟住會放手。照昨日情形睇，佢哋真係你愈唔信，佢就愈夾你，夾到散戶信為止，所以個市氣氛好時，可能先係大戶收爐嘅前奏。
中環茶友問，點解陸Sir估中五窮不窮後，又會估大戶六月仲會繼續夾呢？講出嚟有兩個觀察，首先係去到五月尾，期指出現大低水，即係話好多人仲開緊淡倉，咁多淡倉有兩個可能，一係散戶唔信邪繼續沽；一係大戶累積下月淡倉準備殺番落去。
睇番昨日個市，美股標普500指數連續兩日創歷史新高，刺激恒指高開246點，報23327點。跟住匯豐中國PMI隨後公佈的5月終值仍低於榮枯線，大市升勢放緩，尾市先再擴大至逾200點，恒生指數收報23291點，升209點；國企指數收報10368點，升118點，成交縮減至673億元。除咗熱炒嘅騰訊(700) 、長實(001) 標青，和黃(013) 亦曾創52周新高，高見106.2元，收報105.4元，升1.3%，連素來平淡的恒生銀行(011) 都升成1%。睇嚟，大戶吼住啲落後股去推高指數，掃入恒生呢類穩陣高息股嚟夾人，可以話係一石二鳥啦！
喺升市中，有啲板塊仲係榮辱互見，國務院決定加大「定向降準」力度，內銀股表現標青。農行(1288) 一漲就3.8%，跑贏一眾國企指數成份股。相反，五月份澳門博彩收入按年僅升9.3%，升幅為今年來第二低。濠賭股午後沽壓仍重，銀娛(027) 、澳博(880) 都跌逾3%。內銀、內房同濠賭都係弱勢股份，但正如早前所講，阿爺始終唔想內房、內銀唔掂，處理手法上有壓有保；博彩就唔同，中央未必會錫住佢，所以佢哋弱勢恐怕未完。
濠賭股仔風險特高
澳門近排好似都幾黑仔，特首崔世安喺競選連任前，搞單「離補」風波，成個濠江沸沸揚揚。澳門本來畀人感覺係有乜事閂埋門都可以傾掂，點知突然爆單咁嘅嘢，口痕友就話係咪有人玩嘢先？由於澳門特首換屆在即，跟住又會傾賭權續牌，樣樣都涉及好大利益，外界有呢個估計，只能夠講係正常推測。
同澳門朋友傾開，佢話你睇澳門的博彩收益升幅放緩，只係反映咗部份情況，因為仲有地下經濟未睇到。地下經濟講明唔會蒲面，但情況只會更差，唔會更好。如果照馬交朋友咁講，有牌的博彩公司盤數全部跟正規矩納稅，影響已經較細，其他二三線濠賭股呢個浪可能打得仲應喎！
陸羽仁
金融High Tea 舊文
