中環在線--超人大動作股災先兆？
玄學家：羊年小心大跌市
■李超人每次有大動作，股市之後都出現大冧喎。
長和系主席「超人」李嘉誠喺2015年伊始搞單世紀大重組，伺機遷冊固然值得大家推敲箇中原因，但係有一點，股民都要留意，就係超人過去每次有大動作，好似1987年供股、1997年集團重組控股架構，股市之後都出現大冧市。咁啱得咁蹺，幾位風水師都估計今年有股災危機喎！
華華冇水晶球，唔知今年會否出現87年股災同98年亞洲金融風暴等大事，但坊間講到超人一出手就有股災咁嚴重，咁就當然要去八卦，問嚇專門預測未來嘅玄學家喇，話曬羊年下個月就到，順便講埋羊年股市運程。
唔問由自可，一問就有幾位仁兄講到危危乎。玄學家區仲德指，羊年屬於木火土年，有暗火存在，咁啱1987年發生股災嗰年都有暗火。佢話「暗火容易燒金」，金就代表金融業，有暗火嗰年，股市通常會大跌，股民容易損手，農曆7至9月要特別小心，可能出現一次大跌市咁話。
麥玲玲：上次羊年爆沙士
風水師麥玲玲亦都話羊年股市走勢一般，佢話啲人喺羊年容易受羊群心理影響，股民可能會一齊吹捧一樣嘢，吹捧都唔緊要，最麻煩係羊年可能有突發變動，意指屬於投資風險較高、危機四伏嘅一年，對上一次羊年咪就係2003年爆沙士嗰年。
麥玲玲又指，屬龍、屬虎嘅人喺嚟緊羊年，運程極佳，福星高照，凡事有英明決定；超人同佢大仔李澤鉅咪就係屬龍囉。
有研究術數嘅股評人沈振盈（沈大師）以立春八字算過港股羊年走勢，佢都話本港經濟與股市表面幾好，但暗藏危機，港股有機會由高位大幅下滑，「例如話恒指升上兩萬五、兩萬六，跌番落去兩萬點（超過兩成跌幅）都未定，股市喺第四季特別差」。
話雖如此，有危就有機，區仲德估計，即使有股災，三個月就冇事，叫大家趁跌市入貨喎。其實風水玄學都係畀大家八卦聽嚇，參考嚇就好喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
