歐洲半價放水
2015/01/12 09:10:17
網誌分類: 經濟
香港周末有長和重組的重大消息，外圍較靜，美股在周四大升後周五回吐。
最關注的就業數據出籠，美國12月非農就業崗位增長25.2萬個，高過市場預期的24萬，而失業率降5.6%的6年半低位，亦好過預期的5.7%，不過，工薪卻不升反跌，時薪由11月的上升6美分變成下跌5美分。過去一年，時薪僅增長1.7%，為2012年10月以來最低年度增幅，有工做，無人工加，令總體強勁的就業資料失色。
現時的情況係非農就業數據表明就業不俗，失業率並唔多去到聯儲局的5.5%目標，但薪酬沒有增長，會令到聯儲局官員在加息的決定上猶疑不決，因為這意味通脹率將繼續低於目標，再加上能源價格急挫，一般商品及服務價格因油價暴跌而向下，令人憂慮通縮可能出現，聯儲局目前只能夠按兵不動。
事實上，繼紐約聯儲行長埃文斯(Charles Evans) 早前建議聯儲局在2016年之前不要加息之後，今年同樣有表決權的亞特蘭大聯儲行長洛克哈特(Dennis P. Lockhart) 上周五繼續發放類似的鴿派言論，佢話12月非農就業人數有明顯增長，但這份報告不能作為提前加息的理由。他指出薪資增速緩慢，12月平均時薪下降是「潛在的雜音」，反映就業市場依舊疲軟，他傾向冒「稍微推遲」加息的風險。
就業人數增長強勁，經濟基調良好，但又無提早加息的壓力，原本係推升美股的「絕配」結合，不過美股卻唔係幾「生性」，不升反跌，結束咗連續兩日的強勁反彈勢頭。杜指收市跌171點至17737點，跌幅接近1%；標普500指數跌17點，收市報2045點，跌幅0.8%；納指跌32點至4704點，跌幅0.7%。全個星期，杜指同標普500指數齊跌大約0.5%。
美股之所以不升反跌，主因又係歐洲惹的禍！歐元區因為油價暴跌，令到通脹變通縮，歐元區政府財政百上加斤，再加上希臘可能再玩「脫歐」，歐洲危機又再蒲出水面，令到市場對歐洲央行泵水救市的期望愈來來殷切。歐央行此前亦表示，計劃將資産負債表的規模擴大1萬億歐元。
不過，上週五，彭博社引述一名出席歐洲央行會議的匿名消息人士透露，該行的管理委員會已經制定了一項買債計劃，擬購買最多5000億歐元的「AAA」評級債券或評級「BBB+」的債券。即係話，歐元區救市力度只有預期1萬億歐元的一半，消息出街，歐股即時大冧，其中德國股市及法國股市齊跌1.9%。歐洲股市大跌，投資氣氛唔得，就拖埋美股落水啦。
目前呢個世界，在主要經濟體，只係美國經濟叫做好少少，其他歐、日、中都係經濟唔好要放水先至有得炒，放少啲水，股市就散。
港股方面，大陸A股有少少調整傾向，所以港股年頭升完一浸無乜力再上，可以等等，等佢回深啲才吸納。
陸羽仁
回應(4) 我想回應
陸羽仁 BLOG 舊文
