魚樂無窮：尋找下一隻轉板創仔
■英裘再度入紙申請轉板，相信好事已近；圖為公司主席黃振宙。 資料圖片
潮流興轉板，手遊股IGG（8002）、軟件商龍傑智能卡（8210）宣佈由創板升呢上主板，炒到甩轆。唔講基本因素，淨係睇殼價，創板值三億，主板值五億，身價無啦啦多咗兩億，爆升好合理。
下一隻轉板股，英裘（8168）肯定有份。公司舊年九月已入紙轉板，最新再度提交申請，相信好事已近。英裘主要從事狐狸及水貂毛皮貿易、皮草經紀及水貂場，乃本港獨一無二皮草股，已贏在起跑線。睇基本因素，英裘一早合乎轉板要求︰近三年均賺錢，截至去年九月底止首三季盈利達三千九百七十四萬元，比上年度全年還要多。事實上，今年一月丹麥拍賣會，毛皮價格升逾兩成，利好第四季業績，發盈喜絕對唔意外。
轉板另一個好處，係較易引入基金，老闆黃振宙接受傳媒訪問都講過，唔少基金內部指引講明唔可以買創業板公司，所以一旦成功，以其最新市值六億計，做大做強空間無極限。何況英裘上市以來每年均派息，基金又多一個誘因攞貨，象徵意義大於一切。公司去年底共回購十一次，涉資共千萬，證明市價未能反映實際價值，更重要係作價最高0.352元，噚日收市價講緊0.305元，現價平咗一大截。睇圖表，去年十月以來形成三角形走勢，噚日稍見突破，相信係爆升前奏，如果轉板成功，再試高位0.41元其實唔難。
唐牛
https://www.facebook.com/tongcow88
唐牛
魚樂無窮 - 唐牛 舊文
