中環在線：Coffee教拳師傅開餐廳
杜恆霖泰菜館進駐銅鑼灣
■Coffee（左）最近跟杜恆霖學打拳。
有意將武術健身中心上市嘅泰拳王「風之子」杜恆霖可謂百足咁多爪，佢最近喺銅鑼灣租咗個地舖，準備開泰菜館，計劃做主題餐廳，裏面會播泰拳比賽，成功嘅話，就發展為連鎖式食肆。
杜恆霖早年
喺灣仔開設拳館，2011年去到中環開地舖Fight Factory Gym，吸納到一班OL同上班族食晏時或放工去打拳或做gym，舊年再喺銅鑼灣租咗兩層共7,000平方呎開旗艦店，搵埋「殼後」朱李月華一齊投資。唔少藝人搵杜恆霖做教練，藝人林芊妤（Coffee）最近都成為佢嘅客仔。
■呢個吉舖將會變身泰菜館，杜恆霖開嘅拳館就喺街口。 李潤芳攝 30萬月租一蘭拉麵鄰舖
杜恆霖呢個銅鑼灣旗艦店嘅業主，係已故「收租王」、人稱「倫伯」倫志炎創立嘅永倫集團，永倫喺同一條街有多個舖位，咁啱杜恆霖經常去泰國食到好多地道泰菜，一直想喺香港開番間泰菜館，咁就走去同永倫傾，成功租落一個喺一蘭拉麵旁邊嘅吉舖。
聞說，呢個吉舖嘅上手租客都係做泰菜，做咗大約一年就結業，當時月租27.5萬元；杜恆霖𠵱家新簽嘅租約，月租超過30萬元，係咁易加咗一成租金。
成個舖兩層合共超過5,000平方呎，杜恆霖話，計劃投資600萬元，並由泰國請大廚來港坐鎮，做中價生意，估計晚市人均消費200至300元。佢下月收舖之後就會即刻裝修，希望6月中開業。
佢係呢間泰菜館嘅大股東，仲有其他股東出資，朱太今次就冇參與其中嘞。
永倫揸謝斐道逾半地舖
銅鑼灣波斯富街至堅拿道嘅一段謝斐道，一直係食街，只因近7、8年有太多吉舖湧現而褪色，直至兩年前有一蘭拉麵進駐，先旺番些少。呢個地段嘅商舖，有超過一半由已故「收租王」、人稱「倫伯」倫志炎創立嘅永倫集團持有，包括伊利莎伯大廈商場，而對面一排地舖，除一蘭等幾個舖位與楊耀熾商業大廈地舖唔係由永倫持有之外，其他地舖都係永倫喺過去10年逐步買入。
不過，永倫一直唔積極將啲舖出租。好似伊利莎伯大廈商場，以前有卡拉OK、酒吧、酒樓等，曾經相當熱鬧，但最近4、5年，大部份商舖都丟空，得正門少部份舖位有租客。
粗略估算，如果永倫將成條謝斐道嘅地舖連伊利莎伯大廈商場所有舖位都租出，一年租金收入都應該有2億至3億元。聞說，永倫都開始積極搵租戶，想搞旺番呢條街。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
