內地創高 香港畏高
2015年04月23日
內地官媒力撐股市，上證指數曾見4400關，加上港匯持續強勢，又有投行花旗唱好港股，提高恒生指數目標至32000點，推動港股反覆造好，昨早飆近兩百點，升穿兩萬八，再創逾7年高位。
恒生指數低開29點，早段跌幅擴大至123點，低見27727
點，但內地股市節節攀升，港股亦止跌回升，更一度倒升198點，高見28048點。不過，兩萬八關阻力大，最終港股升幅收窄至不足一百點收市，恒指收27933點，升83點；國企指數收報14669點，升138點，成交金額1878.5億元，不足兩千億元。
唔知係唔係「外資」資金陸續流入下，在內地股市拗腰再上新高時，港股繼續打底，在28000點突少少的部位手騰腳震。
有中環茶友話，據佢觀察，港股A股化唔止係大上大落，仲有一樣係有形之手好似愈來愈明顯，個市愈來愈似「撳掣」，有形之手話叫佢上佢就上，叫佢落佢就落。
茶友話，上星期港股夜期勁插，跌成七百點，跟住就有資金打晒鑼話流入，個市下個交易日不跌反升。之後個市再插，金管局又接到港元買盤，跟住個市又爆番上。去到跌市高位，雖然繼續有錢流入，但指數又唔見飛龍在天，開始浮浮沉沉。內地昨日創新高，香港都跟唔到，有少少畏高。
睇番呢次大時代，個市主要係跟住A股升，但升勢顯然慢了一截，茶友形容，港股係鹹淡水交界，一向是外資大戶話事，同內地唔同，內地大戶就算想南下玩，都唔可能當正係打主場，照?家個勢，港股最多係二分天下，內地大戶係中資股影響力大啲，傳統藍籌就仲係外資話事。內地資金就算恃住錢多，想買起個場，照計都無理由不計價掃貨，較合理做法係慢慢吸。
貨源歸內地大戶
不過，過去一年外資看淡大陸，猛沽中資股，尤其今年A股猛升，H股變成大落後，內地資金反而可以低吸收貨，從呢兩個月H股咁升法，好多貨源可能已經落了內地大戶手中，所以佢話抽上就抽上，插落就插落，亦令港股走勢同內地愈來愈同步。如果按照呢個思路，內地資金會繼續喺半個主場踢落去。
港股呢排猛升，傳統外資睇法係個市被資金驅動，認為呢種升市風險好高，特別係退休基金，更唔會貿貿然咁入市。茶客話，外資如果沽貨，內地資金就不斷吸乾街貨，反正他們已控制較多貨源，舞上舞落佢點計都着數。
指數郁得唔多，但呢個市況好多當炒股都會開車。有個咁多年無買過股的老友，昨日打來問冧巴，問某隻當炒股買唔買得過？喺呢啲時間，我叫佢唔好買，隨時阻佢發達，叫佢買又怕佢貪勝不知輸。
對呢個平時唔買股的老友，我就打咗個譬喻，話你依家講啲股，擺明係莊家炒作，佢就好似係老手釣魚，拋了大塊魚餌落來，條魚見到問我好唔好食，我叫佢唔好食，過兩日佢見到人人都食到餌自然想媽我，但叫佢食，又怕佢上釣，過一排連命都無。
我嘅建議係呢條魚，食餌之前要諗諗，知道自己係偷食，食到固然開心，一旦被釣就唔好怕痛要大力走頭，預咗成個嘴扯甩，搞到成面血，不過咁都好過忍唔到痛被人釣咗上水，因為鈎住甩唔到就會變咗桌上鮮，連命都無。
跟住我再問老友，如果你係條魚，你食唔食魚餌，如果食的話你預咗蝕幾多？諗完你自己揸主意囉。
陸羽仁
金融High Tea 舊文
