中環在線：
牛錶發佈會vs新寫字樓開張
陸叔鄧聲興喜事撞時間
■陸叔同鄧聲興明天都有喜事，咁啱撞時間，股評人兩邊都要畀面，惟有兩頭撲喇。
明天下午4、5點肯定係好時辰，否則兩大股評人陳永陸（陸叔）與鄧聲興（Kenny）都唔會揀埋差唔多時間分別舉行活動。不過最忙係佢兩位一班股評人朋友，
因費事順得哥情失嫂意，畀足面話會極速走兩場。
陸叔為港產陀飛輪品牌「萬希泉」設計嘅「牛錶」，每隻幾萬銀，明天下午4點半就正式喺銅鑼灣一舖頭舉行發佈會。
聽講陸叔老友郭思治與泓福證券林嘉麒各自認購咗3、4隻，陸叔明天會即場慈善拍賣編號「6」嘅手錶，受惠機構係為內地治盲活動籌款嘅健康快車香港基金，基金副主席馬時亨將會現身。
股評人老友兩頭撲
至於最近過檔君陽證券嘅鄧聲興就打算幫公司擴充業務，君陽𠵱家喺中環有個辦事處，最近喺金鐘力寶租多個4,000方呎嘅寫字樓，明天5點開張大吉。呢邊嘅嘉賓亦星光熠熠，有立法會議員張華峰、金利豐（1031）老闆娘朱李月華（朱太）同埋中國3D（8078）老闆蕭定一。
兩大股評人撞曬時間搞活動，佢哋一班股評人朋友講到明兩邊都要畀面。郭sir話會先去陸叔發佈會「亮一亮相」，跟住就會趕喺君陽剪綵前出席儀式。友達資產管理嘅熊麗萍都話，惟有「一邊早走，一邊遲到」。金利豐黃德幾仲誇張，佢話已經一早諗定路線圖，連泊車位都諗好埋，爭取以最快時間兩邊走，跟住仲要趕去教人投資，認真頻撲，辛苦哂！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
