笑到最後：悶聲發財買美聯
4月至今，高明有兩個主要推介。4月頭高明喺本報「周日投資導航」推介京維集團（1195），當時「任買價」為0.485元，最高升至0.84元，升幅73%，最新0.66元；4月27日本欄推介佳華百貨（602），推介日裂口高開0.66元，最高升至0.78元，升幅18%
，最新0.72元。
港股難炒，樓市狂搶，大家可能要面對現實，樓市價量又再旺番，將會成為今年趨勢，要食盡呢個浪，首選買代理美聯（1200）。
根據土地註冊處資料，今年首5個月住宅樓宇買賣金額達1,910億元，較去年同期升47.1%，已經返到接近2012年首5個月1,923億元水平（見表）。
樓市成交金額已經回到2012年「少辣」水平，市場慣曬現有辣招。今日唔同之處，係一手樓發過二手，美聯4月仲話請多啲人做新盤，新盤市場係大行天下，換言之美聯會比當時賺得更多。試諗嚇，過去一年，反辣招冇曬聲氣，因為代理忙緊開單。
地產代理係樓市成交指標，成交重回2012年，全年盈利隨時重返2012年約2.5億元水平，相對美聯去年賺6,397.5萬元，將會多賺3倍。而舊年傭金收入有40億元，本來唔錯，但係因為回贈派多過前年2億半，先至賺咁少。
今年有人排隊多次都抽唔到新樓，購買慾咁強，又點使畀咁多回贈呢？有探子同高明講，美聯內部今年已經禁咗回贈。加上實質成交金額回到2012年水平，代理今年係另一賺到笑年。仲未計A股贏大鑊股民來港買樓。
今個月隨時發盈喜
住宅成交金額首5月升近五成；恒生地產股指數今年升19.21%；中原城市指數今年升6.5%；美聯股價年初至今竟然微跌0.38%，樓市正係欣欣向榮，絕對唔合理。
而且，舊年年尾基金開始儲貨，永明金融於10月3.75蚊加注買，Edgbaston基金舊年3.7至3.8蚊買過一批，今年4月3.5蚊左右再溝，明顯基金已經睇到樓市升浪再臨。
美聯8月出中期業績，早2至3個月出盈利預告，今個月隨時會發盈喜，而家買定等盈喜。樓市成交重回2012年水平，美聯初步目標重上2012年高位5.25蚊，升幅都只係38%，大牛市要升呢個水平實在濕濕碎！
即上偶像派財演專頁：https://www.facebook.com/bigricetea
高明
本欄逢周一刊出
高明
笑到最後 - 高明 舊文
