笑到最後：中國衰 香港好
上個星期因公事忙到報價機都冇時間睇，今日高明貼個冧巴大家都未必信，不如講嚇災後分析。
正如上個禮拜所講，A股太假，已冇代表性。港股重回正常，繼續低估值，升唔爆，跌唔死悶局。
點解估值永遠都咁平？因港股好似港女，港女覺得本地仔（散戶）cheap，唔受媾，一路都
要同洋人（外資）玩，可惜，洋人叻就唔會淪落蘭桂坊，叻嘅鬼佬，「大婆」一定係歐美股，港女永遠只係二奶，唔會要你捱窮，但分身家嗰啲唔使諗。
4月突然有大陸暴發戶嚟媾港女，洋人齊聲話唔值，但又一齊炒高，點知暴發戶玩咗兩嘢，大陸間廠火燭，要返去救，港女又打回原形，去返蘭桂坊同鬼佬玩。港女只配做二奶，但二奶點可能有大婆估值，所唔高係「合理值」，港股估值同美股睇齊先唔合理。
講返轉頭，中央今年對香港送大禮，首推暴力救市。
勿忘初衷，香港只係個轉口港。回歸後香港人經常被叫要「理性務實」，香港人繼續在華洋夾縫之間做買辦就係最「務實」。
無論你幾聲嘶力竭自認「中國人」，中國大陸人大鬧香港人時一句「你們是不是中國人」中嘅「你們」，就已經敵我分明，香港人只係外人。除非香港墜落到變成黃石、清遠之類嘅中國四線城市，咁中國人有可能當你係自己人，但係就會極之睇唔起你。不過而家香港唔似會極速墜落。
中國唔靠中間人
高明認為，奠定香港金融中心地位一刻，根據高陽嘅「胡雪巖傳」，係清朝光緒七年（1881年，當年中共仲未成立）政府要借外債打仗，就係問當時總行已經喺香港嘅滙豐銀行借，現稱滙控（005）。最正嘅係，大部份「洋債」資金係出自德國泰來洋行，滙豐只係出面，因為滙豐當時已經係洋商領袖易啲吹雞。靠吹水淨係做串連，呢單deal非常「香港仔性格」。
自此，無論共產黨上台後上海商人走難、抵壘政策逃亡、紅籌國企上市集資，都係揀香港。
但係近年香港咁弱，主要係因為「中國好」，唔需要再靠中間人，直接向外做deal即可，大陸富豪買樓、中產家庭買奶粉，始終都係面嗰浸，好少人受惠，同IPO潮都冇得比，何況清政府等你筆錢打仗救命？
中國近年強到可直接同鬼佬玩，甚至自設亞投行叫鬼佬嚟玩。直至暴力救市，令到中國呢個學緊著西裝扮文明嘅政權，又露返爛仔嘅底牌。華文文人點吹噓「美國都有救市」都好，外國唔信你就唔信你。
洋人對你中國夢、民族大義、甚至民主人權都無甚興趣，只係想賺你錢，但又驚唔知你下次會唔會「暴力亂嚟」。結果要入中國，又要靠香港。香港，始終係一個發中國國難財嘅地方。
高明
即上偶像派財演專頁：
https://www.facebook.com/bigricetea
本欄逢周一刊出
高明
笑到最後 - 高明 舊文
