一周三件：墨龍叫緊兩飛
■山東墨龍H股現價3.56元，比本身深圳上市A股12.74元，大折讓72%。 互聯網
港交所（388）舵手李小加上個月話，深港通如期喺今個月尾完成準備工作，兼好快公佈開通時間。家陣踏入7月下旬，準備功夫已八八九九，兼隨時有消息公佈。買深港通concept，買山
東墨龍（568），集團折讓最大嘅深AH折讓股。
H股大折讓吸引
山東墨龍H股現價（3.56元），比本身深圳上市A股（深002490）12.74元，大折讓72%，係喺香江有對應深圳上市股票當中，AH折讓最大者，亦係全港88隻有對應AH股當中，折讓排第四。又行家海油服務（2883）H股比本身A股（滬601808）折讓56%，墨龍AH股折讓，亦比行家吸引。諗到嘅係，若果深港通開車，AH股折讓，會係一個大主題，墨龍折讓吸引到痹。
仲未止，墨龍現價貼住八年海底價，得0.84倍PB，深圳上市行家石化機械（深000852）8倍PB、惠博普（深002554）3.2倍，又香江中石化油服（1033）1.4倍PB、墨龍PB平咗一大截。
墨龍預計，喺嚟緊半年盈利，會由持平到最多增長30%。炒盈喜，有得叫糊之餘，墨龍包括油套管同管線管等等主打產品，已經通過俄羅斯同烏茲別克斯坦等地區認證，又集團家陣海外銷售營收比重，佔40%。睇到嘅係，墨龍走出去策略，穩住業績，產品亦獲得海外客戶認受，亦證明有競爭優勢。而上邊所提及地區，都係一帶一路油線，墨龍海外強勢，食住呢個重中之重嘅國策，中線少少，成績單亦應該keep住靚仔。
炒墨龍，博深港就快通，再博盈喜，翻半番到5.34元，PB先得1.27倍，都仲未追到最近磅中石化油服1.4倍PB水位；而墨龍到時AH股折讓，縮窄到58%，但比起中海油服AH股折讓，亦係仲有距離。
錢雋
細價股專家
本欄逢周一、三、五刊出
錢雋
一周三件 - 錢雋 舊文
