金手指：不能再買牛熊證
■由於港股出現「非理性」價格，故牛熊證玩都無謂。 資料圖片
今日，要幫自己倒米。不過，因為孫柏文係個極負責任嘅財經演員，就算會被輪商斷米路都好，要講嘅就要講。咁要講咩？就係作為香港股票市場參與者，唔可以再玩牛熊證。
牛熊證出現多年，相信大家都知佢嘅特質喺邊，就
係不但提供槓桿外，仲要有回收價。而如果你肯受有回收機制嘅威脅，你換來嘅就係唔使輸窩輪有嘅時間值損耗。公平、公開、公正。
出現非理性價格
咁點解今時今日唔可以再掂？原因係當你買一隻牛熊證，你揀選嘅第一件事就係決定買邊個回收價嘅證。而呢個決定，就係建基於你估其他投資者嘅睇法。例如，你睇好中移動（941），覺得會上到120元，咁你就要諗：「最差會見到乜位先上到去呢？」
原先，作為香港投資者，你可以攞到嘅資訊同其他人差唔多，其他人點睇，算係有路捉。不過，到7月8日，當恒指跌約2,200點時，我忽然有個覺悟。香港今時今日有一大批嘅參與者，手上嘅資訊冇我哋咁多。當佢哋用僅有嘅資訊作出買賣決定時，就算完全理性，從我哋有更多資訊嘅角度而言，會話：「咁嘅價都沽？係咪黐線㗎？」又或者「咁嘅價都仲買？癲㗎！」
去年，我話過滬港通唔會落實，原因係當大陸投資者要面對資訊封鎖時，會變成我哋嘅點心。點知佢真係推咗，而喺7月8日，真係變咗我哋嘅點心。
咁即係話，因缺乏資訊嘅大陸投資者喺香港有價格影響力時，就會不斷出現從我哋角度覺得係非理性嘅價格。有時太高，有時太低。我哋只要太高時沽，太低時買，就穩賺。
但同時因為會出現呢啲「非理性」太高太低嘅價格，你都無法捉路。即係買咗牛熊證嘅人，就會好容易升凸跌凸被回收。我唔知呢啲非理性價格現象可以維持幾耐，不過，喺未退之前，小心為妙。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
