智取大市：熄機一周 等破產價
當大家擔心緊大陸爆煲之際，美股道指技術圖表已經做緊一個圓頂，14日RSI已經脫離咗由2009年海嘯後至今嘅30至70橫行通道，通道最近幾個月收窄至40至60，仲要向下傾，係長線轉弱訊號，走勢一如2008年金融海嘯途中。就咁睇，分分鐘中美股市齊齊火燒後欄。
今年6月25日至7月8日，港股喺9個交易日內急跌接近4,000點，下跌動力非常大，而反彈過後，單日大跌市成交增加，可見股災mode再啟動，後市跌幅可能相比7月初有過之而無不及，恒指相信跌破22836點不低。今個星期最好咪手多多撈底，不妨熄機，等下星期再睇有冇破產價撈貨博反彈嘅機會。
跌市恐累潛在併購
作為後市溫度計，併購消息相當重要，尤其之前升市熱辣辣之時，本地證券股接連有賣盤或配股消息，而家咁啱得咁蹺全部都hold住未落實，如果呢啲交易最終全線拉倒，後市當然唔慌好得去邊。
華富國際（952）同民銀國際簽賣盤嘅諒解備忘錄，原本喺6月18日截止，但後尾延長到去7月18日，再跟住又延遲至7月31日。至於時富金融（510）同潛在投資者洽商股份交易，亦遲遲未完成。
另外，新華匯富（188）以每股0.35元向廣州匯垠配售2.9億股單deal，原本明明話配股喺7月13日完成，集資1億元。點知去到上個星期五，淨係找數1,260萬元，其餘要8月31日之前先找數。
以上種種，令晉佳回想起一次畢生難忘嘅慘痛經歷。喺2011年6月，晉佳重鎚買入當時由華人置業（127）持有嘅至祥置業（現為勒泰商地、股票代號112），持股已佔資本三分之一。
去到6月尾，至祥突然停牌，跟住傳出金地收購至祥，停牌期間，華人置業喺聯交所SDI申報咗向金地出售至祥股權，交易睇嚟已成定局，股價倍升應冇難度，心諗呢鋪仲唔發達。殊不知喺8月1日，至祥復牌，竟然宣佈金地收購交易告吹，股價裂口低開三成，晉佳由贏大鑊變成重創。可能有人預示到後市唔妥，所以至祥單deal急急腳取消。8月初歐債危機正式爆發，港股進入大跌市，短短6日急跌約4,000點。以上一連串不幸事件，成為晉佳有生以嚟最大敗仗。
大爛地跑馬，大熱門都容易啲失蹄墮馬，披士都收唔番。大跌市之中，上市公司併購活動亦可以隨時因為市況逆轉而不幸拉倒，實在不得不防。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
