一放就跌
2015年07月28日
港股昨日插到阿媽都差啲唔認得！值得注意嘅係，港股帶頭先跌，內地無力跟跌，呢個可以視為中國經濟弱勢，股市無乜水的現象。
內地股市昨日上半場仲好啲，跌2.4%，仲少過港股2.8%的跌幅(恆指半日跌706點)，
但內地下半場就插得仲厲害，阿爺諗住內地期指結算後慳啲力，由得個市浮沉吓，結果一有異動，個市就好似現時狀況，一插就直插落去無水花。一般靠估，再插深少少，中央又要出來托市，阿爺想話慳點力都唔係咁易。
退市係假命題
早排個市穩定少少，有人就問中央幾時退市，有報道仲言之鑿鑿，話中證監研究幾個方案退市將股票沽番出街。上星期國際貨幣基金組織(IMF)指人民幣如要加入特別提款權(SDR)需加快金融改革，再度引起市場擔憂中央會否因此加速退市。?家證明呢個係「假命題」，實際上邊有可能咁快退市，賣番早排托市買的大量股票出來呢？現在中央先要做的是點樣可以唔使托市，等個市回復自由浮動，同時又唔會動輒就大插，做得到呢樣嘢，先至有條件講其他啦。
昨日大市咁跌法，正好說明阿爺一方面減低場外融資的槓桿，另一方面想減少干預，並未成功。內地上證綜指昨日收報3725點，先前陸羽仁估計，內地股市災後大約在3700至4200點浮動，上方真係差不多，下方唔知守唔守到，若3700穿埋再插深啲，阿爺可能又要出手，否則好易無底下探。如果根據呢個估計，港股都係跟隨波動。有人擔心恒指會唔會插穿上次個底，A股如果因中央會力托唔大穿老底的話，港股應該都唔會穿底。
除了內地因素，當然仲要睇美股，仲要睇埋今個星期四凌晨美國聯儲局會議結果點。一般開會未必會咁快有消息出來，除非今次會議決定九月份加息，否則都未必會咁快講定幾時加息，綁死自己。
按照聯儲局上星期意外在網上洩露內部經濟分析文件，聯儲局分析員預計美國年底前聯邦基金利率會係0.35厘，推算預計今年只會加息一次，幅度約0.25厘，到2016年及2017年，聯儲局預計利率會是分別升至1.26及2.12厘，即是明年可能再要加三次息。(美國加息問題詳見周一網誌)
目前估計，港股有可能會再插一陣，如果個市再插深，到時水平低可以買少少，手頭上貨唔多的投資者可以中線儲番啲貨。不過，呢種市買貨，都要抱着摸住石頭過河的心態，主要是美國開始加息始終係大事，要保持彈性，就算入貨都唔好大棍就全力扑落去。
內地股市急瀉，上證指數全日挫8.48%，收報3725點，跌345點，創八年來最大單日跌幅，蒸發由本月16日起連續六日的全部升幅。深成指收報12493點，跌1025點或7.59%。滬深成交1.4萬億元人民幣，超過1800隻股跌停板。
惠理主席沽完貨叫人冷靜
A股急挫同美股四連瀉夾擊下，港股一度瀉超過800點，恒生指數收造24351點，跌776點；國企指數收報11230點，跌448點，跌市成交增，去到1163億元。
個市咁插法，早排趁股市去到最高位沽了唔少貨套現的惠理集團(806) 主席謝清海(見圖)就話，雖然A股於6至7月份跌逾20%，但本港及上海的投資者未有出現大恐慌。由於今年A股仍有20%升幅，下跌未至於造成崩盤，只屬於較大幅度的調整。
謝清海仲力挺救市屬必須，話今次為中央進行金融改革提供機會，內地股市需要有更好的監管制度、企業管治，以及更多機構投資者參與，令市況較少受政策影響，回歸基本面。投資者現階段只需要保持冷靜，相信未來A股會更健康及具持續性。
謝主席?家手頭大把現金，自然可以冷靜應對，所以話投資呢件事，人家意見幾時都可以聽，最重要係自己睇住自己喺咩嘢位置，有水靈活性就大啦。
陸羽仁
金融High Tea 舊文
