智取大市：防守性股份欠防守力
7月份跌市，發現原來有九成嘅港股喺度裸泳，剩番嗰一成，包括友邦保險（1299）、騰訊（700）、中銀香港（2388），跌市保持硬淨。
大家相信嘅係呢批股票的基本因素，例如友邦年年保持超過10%增長，騰訊亦從來未試過交唔到數，每年盈利至少增長兩成。持貨長情股
東一直持有，贏足成條街，形成股東持貨能力極強，跌市甚少人沽出。
2013年，科網、濠賭股齊齊炒上，成為大市領頭羊。直至舊年，銀娛（027）、金沙（1928）經不起內地反貪腐打擊，收入增長開始跪低，股價拾級而下，呢個故事告訴大家，就算股東持貨能力高強，若面對盈利增長見頂，乜嘢股票都有可能由強勢變弱勢。
雖然科網股之中，騰訊係唯一能夠保持強勢嘅股份，但舊年已經開始拼命尋找新增長點，例如同阿里巴巴展開打的Apps大戰，就知道騰訊要搏命搵新增長點，過程已非過去般容易。
騰訊盈利增長十幾年，但未來有可能隨住內地用戶數字飽和、遊戲及廣告業務增長放緩而開始減慢，加上微信攻海外表現一般，未來增長靠嘅係內地微信廣告，互聯網金融能否成氣候，係一個問號，O2O長遠賺錢能力亦成疑。猶如一條泳褲著咗十幾年都會折舊，著到鬆曬，一個大浪打到嚟的話，泳褲都隨時沖甩咗，最後咪又係裸泳。
呢一刻，要騰訊升20%嘅難度，同下跌20%嘅機會最多相若，投資一定係講值博率，所以對於類似穩陣嘅股份，已經去到需要認真審視前景嘅時候。
後市睇跌多過睇升
投資者近期不計風險回報地拚命尋找穩陣、防守性股份嘅一幕，令晉佳回想起2008年金融海嘯前的一件軼事。當年有一位同僚，向晉佳推介維他奶（345）乜乜乜，話防守性強，基金唔准hold cash之下，一定焗住買呢類股，所以未來有20%潛在升幅。
晉佳答佢，點解要為咗20%回報去冒逆市風險？其後金融海嘯殺到，結果毋須多講。
故事告訴大家，當去到跌市中途，防守性股份被吹捧，證明市場上面根本冇好嘢買。如果喺跌市之中，買入防守性股份，就等如著住底褲去遊水。
雖然好過裸泳，一個浪打埋嚟，底褲未濕得透，但第二、第三個浪打埋嚟，就算條底褲係幾靚牌子，一樣會濕到現形。
晉佳近期見過唔少基金經理，部份提到，目前港股最大致命傷，係從基本因素去睇，能夠見到盈利增長、復蘇嘅股票少之又少，國企唔得，製造業又唔得，銀行壞賬風險又高。呢個價冇嘢買得落手，自然要透過股價下跌，先能夠令市場變得吸引，諗到呢度，都係嗰句，後市睇跌多過睇升。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
