金手指 - 孫柏文 2015年8月4日
金手指：國內存款要即走
■近期有很多人話人民幣會貶值，連內銀的研究部都咁講。 資料圖片
上周，同孫柏文一樣係獅子山學會董事嘅王弼，來短訊話：「嘩！我呢排寫（喺友報）話人民幣會貶值，引來網上啲人勁鬧。」咁我就諗，呢個唔係得佢講，好多人都話人民幣會貶值，連啲內銀嘅研究部都咁講，點解啲網友會特別揼佢呢？
搵股民夾錢填氹
王弼就繼續話：「大把人話人民幣會貶值，要滙返做其他貨幣如港元。不過我不但咁講，仲要提款將啲錢滙返落香港啲銀行到。」睇到呢度，我知大鑊，唔怪之得咁多人鬧佢。我就話：「恭喜你，你而家就係似我喺2007年，滙豐出中期業績嗰日，我叫人一注獨沽滙豐一樣。」
其實，喺2014年初，我已講過話習總任內近乎唯一要搞掂嘅問題，就係喺2009年後放出段萬億計現以摧毀嘅資本，變成冇得還嘅呆壞賬時，條數點填？同邊個硬食？長遠最有益當然就係啲銀行自己食，即股東先輸，如果銀行資不抵債，銀行啲債主（即存戶）都要輸。不過呢個方案不太「行政方便」，所以大陸唔會做。
退而求其次，就係搵一班輸咗錢都冇人可憐嘅人去夾錢填氹。係邊個？咪就係啲股民囉。原本個如意算盤，就係托高股價，瘋狂批股，等啲公司大把現金還錢。點知股市都爆埋，呢招唔可行。
咁又可以點？咪就係學全世界咁印鈔票注入啲銀行囉。不過，此舉就會令啲人對人民幣購買力失去信心，而將人民幣沽出。呢個就係大家都見到。
不過王弼話嘅，國家又唔想見到人民幣貶值。所以幾萬億嘅外滙儲備，用埋槓桿，輕易托住離岸人民幣滙價。而國內人民幣就係用行政手段「落閘放狗唔畀走」。
咁你應該點？好簡單，你今日走去問一個之前冇提清存款嘅希臘人：「如果可以時光倒流到兩年前會點做？」你估佢會點答？你估佢個心情如何？你想唔想學佢？
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
