中暑碌低
2015年08月04日
天氣放晴，香港氣溫三十幾度，但內地經濟繼續涼氣湧現。最新公佈的數據反映下行持續，中港兩地股市插低，收市雖然跌幅收窄，但下跌股份成千隻，氣氛仍然唔靚仔。
七月財新製造業採購經理指數PMI創兩年低位，內地實體經濟差唔在講，七月爆發的A股股災，進一步產生
負財富效應。利福國際(1212) 主席兼首席執行官劉鑾鴻就透露，七月內地股市發生股災，對本港上月零售市道有較明顯影響，希望透過店面改裝，盡快追回下跌的銷售數字。
未到冬天已難捱
細劉話，集團旗下銅鑼灣崇光上半年同店銷售按年下跌1.4%，主要受全球經濟及金融市場多方面不確定因素，當中以內地客消費意欲跌幅較大，好彩係公司旗下包括尖沙咀崇光及銅鑼灣崇光銷售情況對比大市要好。佢話?家要諗計增加收入，正為銅鑼灣崇光加速改裝步伐，提高面積使用率，並把原以女裝手袋為主的B1層改為銷售化妝品。
聽零售業人士講，崇光喺行內最硬淨嘅場，就算喺去年佔領前後，對生意影響都唔係咁大，銅鑼灣崇光銷售出現一跌，可以話係罕見現象，連強手都要退步，其他零售生意更加係一葉知秋。好似傳出欠租「執笠」的連鎖家電直銷店「DSC德爾斯」，昨早店舖大門張貼「結束及遣散員工」通告。
香港電器零售一向競爭激烈，特別喺十年前左右內地大型電器零售商陸續來港插旗，呢類商店利錢愈來愈薄，好多商店都靠賣手機同埋自由客嚟維皮。「DSC德爾斯」過往以平價策略搶佔市場，加上開店好多，租金成本唔平，一旦生意回落，就好易頂唔順。
做生意好景有得做，逆境都有得做。好景時要搶生意、逆境時要控制成本，最難係轉角時，生意好難增長，但成本繼續攀升，如果利錢太薄，本身個底唔夠厚，咁就唔係喺寒冬時凍親，而會變成大熱天時中暑碌低。我覺得零售股的冬天好長，可能反覆跌一兩年，暫時唔好掂住。
?家咁嘅環境，可能好多人寧願揸番多啲銀紙。港交所股權資料顯示，大快活(052) 行政總裁兼執行董事陳志成申報，於七月二十九日減持公司股份13.45萬股，每股平均價23.037元，持股由1.36%降至1.25%。
匯控中期叻番次
個市暫時好消息欠奉，內地八月開市已捱沽，港股跌勢加深，最多跌404點低見24232點。午後，港股跌勢一度喘穩，A股收市歐洲起身後，港股沽壓一度增加，跌近四百點，可能同希臘股市復市大插20%以上有關，惟港股尾市買盤湧現，最終力守24400點，全日下跌逾兩百點收市。
恒生指數收造24411點，跌224點；國企指數收報11009點，跌121點，成交微增至795億元，由於跌市成交唔大，個市短期反彈都唔奇。
市場焦點之一匯控(005) 公佈上半年業績，稅前利潤增加10%，好過市場預期，全日揚2%，收71.05元，為表現最叻藍籌股；旗下恒生銀行(011) 因為有特殊收益中期純利大升1.4倍，全日收造159.6元，升0.44%；東亞(023) 中績減少6.3%至33.54億元，全日跌2.23%。
人民銀行擬限制網絡支付方法，每日透過第三方支付工具支付金額限制在5000元人民幣，引起外界關注，支付股遭拋售。創新支付(8083) 挫7.5%，造0.62元；中國支付通(8325) 急跌8.7%。跌幅唔算大啦。
科網龍頭騰訊(700) 好啲，跌0.48%，收144元。佢夥拍恒大地產(3333) 落實入主嘅馬斯葛(136) ，復牌即爆升，為升幅最大港股，收造0.49元，炒高72%。
陸羽仁
金融High Tea 舊文
