智取大市：貪腐破壞經濟長城
今次所謂國企改革，係將之前做過試點嘅整體上市、混合所有制，同埋管理層薪酬制度、股權激勵發大嚟做。時間表方面，到2020年，國企改革重要領域同關鍵環節要取得決定性成果。
整體上市同混合所有制講求融資信心同市場功能配合，但經歷A股一連串行倒車嘅舉措之後，A股嘅
融資、定價、抵押功能，起碼喪失一半，呢一刻點有條件同你講推行混合所有制同整體上市？你話五年內要將30萬億元人民幣嘅國有資產上市，豈不是又要重蹈2010年解禁股大量上市覆轍，製造大量股票供應再隊冧A股多一次？聽到呢度，A股長遠搵鬼同你買。
點解一定要增加股票供應？原因係好多間國企孭緊幾百巴仙淨負債比率，每年跑數用嚟供奉內銀多過派息，想大搞研發提升競爭力都好難，轉而令國家競爭力下降，經濟表現停滯不前。
中央透過整體上市、混合所有制，嚟一招資本大召集，等國企可以減債之餘，仲有餘力投入研發，以及提升生產力，但恐怕如意算盤難以打響。以噚日A股嘅反應，證明投資者唔想再中伏了，又要拎真金白銀出嚟貢獻畀國企高層去燒，儍的嗎？
國企點解會債台高築？其實就係兩個字──貪腐，國企多年嚟做過嘅大生意、大投資，都少不了貪腐過程。原本一單生意有10蚊收入，好好地有4蚊毛利，點知中間有2蚊俾人食夾棍，剩番2蚊盈利；國企搵人起廠自用，原本10蚊可以搞掂，最後打龍通叫價30蚊，20蚊有人袋袋平安。
股民厭倦改革藍圖
咁嘅情況，國企好景時都仲叫有得賺嚇，但一個金融海嘯打埋嚟，國企輸錢，現金又被人淘空了，面前仲有條長城咁長嘅資本開支要找數，最終咪要問銀行舉債，以至債台高築。所謂改革，就係想搵百姓血汗錢、外資嘅投資，去為貪腐買單。
另一方面，中央又想引入股權激勵，同時令管理層薪酬市場化，推動國企員工畀心機做嘢。
講到呢度，又有問題。國企高層收到股權激勵，谷起國企股價50%，可以賺1億元，又點夠外判幾單1億工程，然後每單工程食夾棍2,000萬元咁易搵？
今年7月A股去槓桿，迫使一批槓桿投資者被動斬倉，股民有感被中央所出賣，信心摧漽了，後患才剛剛開始。
A股投資者已經聽厭中央嗌口號式嘅改革藍圖，無人願意畀錢人哋貪，同你唔願意捐錢去大陸同一道理。
資本市場不配合，未來內地經濟改革將會寸步難行，長遠要逼中央還原基本步，要有務實計劃、說到做到的能力，畀到投資者中國是可靠的，先有人投資。羅馬非一日建成，要中國翻身，唔知會唔會快得過日本。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
