金手指：珠管地皮有價
珠江鋼管的廠房地皮早前成功申請轉土地用途，圖為公司主席陳昌。 資料圖片
仲差啲啲，儲局就會開會議息。大家期待已久「加定唔加」嘅決定好快就知。孫柏文估，當然係唔加息啦，不過，最有利股市就係聯儲局真係加息，不過就係只係象徵式咁加，跟住就係咁話「有排都唔加啦」，去安撫
全球炒家心情。雖然加息會令股市插多嘢，仲可能係大插插。不過如果係咁，股市今年有望見底，因為當花旗國加完一嘢後，都唔再收緊信貸，我國中央暴力救銀行（即印炒票注資或降低銀行成本去畀佢哋賺多啲填壞賬氹），就會有細啲嘅代價（印鈔後令人民幣跌，消耗外滙儲備兼粉碎人民幣儲備貨幣夢）。
好消息可變壞消息
如果真係咁筍，插落兼反彈可能好快，就要喺聯儲局議息前買定貨等爆升。不過我都覺得非常不明朗，因為連我啲偶像（例如Jeff Gundlach）都相繼出來勸聯儲局唔好加息時，即係聯儲局真係好想加息，仲要係加到市場頂唔順嗰隻。所以都係等佢哋有決定後，睇完、諗完再部署。
禮拜一，升幅榜殿軍係我以前推介過嘅珠江鋼管（1938）。不過就算單日升咗好多，股價都仲係比我幾年前推介時大潛水。原因係佢雖產品質素高，不過全球特別係對上12個月對所有運輸嘅需求都大減，股價都係冇運行。咁佢噚日升嘅原因，係因為佢哋以前有塊廠房地皮，好早前成功申請轉土地用途後，到上個禮拜五晚有發展大計。佢哋可以起55萬平方米嘅商業樓宇。以佢哋市值得14億元來計，每呎賺到200蚊人民幣，已等於成間公司嘅市值，鋼管業務當送。理論上好抵買。
不過，珠管本身負債我覺得頗高，仲要面對嘅利息唔平，佢哋可唔可以借到錢起，又或者要幾貴利息先借到係個大問題。而最令我擔心嘅係起完有冇人租呢？如果出租率唔得，會點？到時好消息就會變壞消息。除非佢哋轉陣，搵到啲實力拍擋一齊上。如果唔係，小心為妙。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
