中環在線：為下月維港泳造勢
施老闆 青姐 影水底相
■施永青袋住幾嚿鉛先沉到落水影相，身旁有潛水員隨時幫手，十分安全。
噚日facebook俾好多名人嘅水底照洗版，最吸睛當然係欣宜嘅美人魚造型喇，睇睇下，發現兩個財經界熟識嘅面孔，就係中原地產老闆施永青同埋股評人胡孟青，佢哋全部都係為
推廣下月18日舉行嘅「新世界維港泳2015」而落水嘅。
青姐話，大會今年特別從本港不同界別，邀請不同人物影水底相，希望透過社交媒體推廣下月維港泳（已截止報名，純推廣）。佢同施永青上月初拍照，地點係恒生商學院室內泳池，大會要求大家保密，直至噚日中午先將相片放上facebook。
水底擺姿勢 閉氣最難
青姐今次影水底相屬義務性質，佢自己嗰部份，喺水底斷斷續續花咗一個半小時，先係有教練教佢閉氣，再落水拍攝。因為佢唔熟水性，所以覺得閉氣最難，不過佢都可以keep到每次閉氣1分鐘畀攝影師影相。
除咗閉氣，最難係要沉到落水底擺姿勢，佢同施永青著住套裝、西裝，工作人員就將多嚿鉛放入佢哋嘅袋，青姐自己袋咗5嚿，一上水就要工作人員幫手拎走啲鉛先行得鬱。施老闆都話，落水初時浮得滯，要加多幾嚿鉛先控制到沉落水嘅姿勢。
唔講唔知，施老闆遊過3次渡海泳，第一次喺上世紀70年代，2011年復辦同舊年都有參加，今年照樣報名，佢形容由九龍遊去港島係挑戰。至於青姐，佢話最叻遊泳池，唔會參賽。換言之，大家下月睇唔到水著青姐了。
李華華
mailto:LiWaWa@AppleDaily.com
■兩個「青」呢次合作好多水花。 
■胡孟青（右）要戴住泳鏡，唔及施永青咁熟水性。 李華華
LiWaWa@AppleDaily.com
中環在線 - 李華華 舊文
