女神tea time - Fifi 2015年9月8日
女神tea time：
領展仲係防守股？
■領匯近年北上收購，但與不少內地公司撞名，故索性改名為「領展」。 資料圖片
好多人揀防守股第一時間就會諗起領匯（823）。相信呢個時候，你就急不及待想糾正我：「人哋改咗名做領展啦！」而正正因為佢改名，先話俾你聽領匯今時不同往日了。
領匯改名，你估真係為轉運？領匯近年北上收購，但就同內地唔少公司撞名。為免要打官司，索性改名做「領展」。領匯品牌發展多年，唔係為咗喺內地大搞正常都唔會改名啦。
公司積極發展內地市場，嚇嚇一線商場，第一單刁係收購深圳龍崗萬科廣場，最後傾唔成；但到3月及8月，就分別成功收購北京歐美匯購物中心，以及上海企業天地兩幢辦公室大樓。內地經濟前景看淡，依家先北上發展，情況就似6月頭先話要入市，即係高追。
香港業務方面，領展近年轉型走中高檔路綫。以小西灣街巿為例，用2,500萬翻新推視像揀活雞i-Chicken。翻新都係為加租，間接逼小商戶加價。然而師奶買餸，要舒服就去超市，要平就揀街市。領展街市經營策略，不敢苟同。
頻傳部署賣商場，香港零售轉差，沽到都難靚價。租務市場亦轉差，估值會被拖低。領展野心大增加不明朗因素，股價跌咁多，股息率先得4厘，咁你話佢仲係咪防守股？
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文
