魚樂無窮：
「息」字頭上一把刀
■A股復市後，收市跌2.5%，再度逼近3000大關。 資料圖片
A股復市，煙花只放了半天，埋單跌2.5%，再度逼近3000大關，上周為閱兵做勢嘅內銀A股，跌到一仆一碌。內地三大交易所收市後宣佈，擬引入熔斷機制︰假設滬深300指數單日升或跌5%，兩地上市股
票以及股指期貨全部停賽30分鐘；假設升或跌幅達7%，即時宣佈全日停市。回帶睇番7月至今，滬深300指數有16次嘅波幅，足以啟動新機制。
「A股停賽關我鬼事咩，我都冇玩開！」還記得港股7月8日股災嗎？就係因為內地孖展爆煲令股市流動性抽緊，大戶紛紛南下沽貨套現，最新停賽機制下，港股被撳錢機會大增，實在不敢想像！
港股繼續陰跌，銀行股首當其衝︰四大內銀齊創52周新低，滙控（005）重返2012年水平，中銀香港（2388）沽壓持續。齋睇數據，工中建農息率超過七厘，滙控6.7厘，連中銀接近五厘，看似吸引，但全因價跌推高息率，再諗長遠啲，內地經濟差到冇朋友，銀行股作為百業之母，肯定要硬食，從內銀中期壞賬不跌反升可見一斑。另一方面，阿爺亂出招，環球經濟復蘇步伐亂曬，滙控亦唔會好過。
一句到尾，大環境唔掂，粒粒皆辛苦，銀行股未來減少派息機會肯定大過增加，冇升又冇息，估值由平變貴，你還敢掂嗎？
唐牛
https://www.facebook.com/tongcow88
唐牛
魚樂無窮 - 唐牛 舊文
