蠱惑跌市
2015年09月08日
港股昨日走勢好蠱惑，以為佢會大幅低開，點知佢一跌即彈，跟住以為佢會好啲，點知就跟內地股市先升後跌，到收市就插咗落嚟。有屬於膽小一族的茶友話，個市撐一撐先跌，會唔會係淡友平咗倉然後再沽呢？若然係咁，最驚個市仲未跌完喎。
人行行長周小川「
出口術」，表示股市調整已大致到位，又有中國證監會計劃採取熔斷機制等多個措施維護股市穩定，內地股市開市後都頂得一陣，上證開盤後迅速上攻，漲幅一度達1.8%。可惜好景不常，下午銀行、保險被淡友閃攻急插，拖累大市下跌。上證指數全日收報3080點，跌79點；深成指數收報9991點，跌63點；成交量大幅萎縮，兩市合計不到6000億元人民幣。
港元強 避險意識高
外圍昨晚無市，港股變成睇住A股做人，早段內地股市大幅攀升，以為會跌的港股掉頭向上，最多竟然升了216點，無奈好景不常，升幅慢慢收窄，尾市跌勢仲加劇，恒生指數收報20583點，又跌257點；國企指數收報9103點，跌66點，成交縮減至672億元。
藍籌股匯控(005) 相當慘情，又挫逾2%，報58.2元。內銀都同病相憐，A股無人再頂大瀉，交行A股跌停，本港內銀H股齊遭拋售。建行(939) 跌1.6%，報5.06元；工行(1398) 跌1.6%，報4.33元；中行(3988) 下滑1.8%，報3.26元；交通銀行(3328) 跌0.19%，報5.22元。另一難睇板塊係濠賭股，市場擔心今年澳門餘下時間博彩收益難好轉，濠賭股續捱打。
在股市積弱下，港元持續強勢，金管局再接美電沽盤，向市場注入31億港元，令周三結算的銀行同業戶口結餘增至3269.32億元。有分析美電沽盤主要來自人民幣拆倉盤，資金繼續流入，反映熱錢仲係擔心人民幣匯價不穩定，顯示資金避險意識仲係好強，所以出現港元強港股不升反跌的怪現象，相信要等熱錢拆倉完成，情況先會穩定番啲。
有本地傳媒報道，樂視奪得本港2016至2017球季起連續三季的英格蘭超級聯賽直播權，傳投得金額高達4億至6億美元，比起nowTV上次約2億美元買入直播權貴好多。消息傳來，都有小小令人意外，據聞今次英超聯，本地電視台包括香港電訊(6823) 屬下的now；同有線寬頻(1097) 都係慳住荷包，唔肯出高價角逐，大家以為呢次肥肉要變瘦肉，點知突然殺出個樂視高價去搶，究竟佢係咪肯出咁多錢唔知，但就證明咗之前投過轉播權嘅now同有線都唔再肯出高價去搶。若然樂視咁玩，收費電視市場又有大戰。
網企亂搞玩殘電視業
有電視友話，收費電視台咁多年投英超聯轉播權，有線係最初時有着數，跟住就係蝕住做，後來now搶嚟做，對上客係有幫助，但就唔講得點賺錢啦！呢幾年由於網上有得睇，基本上限制咗英超聯收費價值，所以兩家電視台計過數，唔出高價去搶係明智決定。
有人話互網媒興起影響紙媒，實際上佢影響好多行業，電子傳媒所受衝擊可能比紙媒仲直接。依家好多機頂盒服務免費提供大量視頻資訊，直接同電視台競爭，這些機頂盒基本上係四圍撈料去提供服務，營收者收益唔多，但就令大量廣告蒸發，變成多輸。在網媒衝擊下，有線股價長期係低位浮沉，一直屬於高派息的乳牛股電視廣播(511) 再見今年低位27.25元，同高位49.6元比跌45%。電視股前景亦難睇好啦。
陸羽仁
金融High Tea 舊文
