中環在線：國泰空姐唱出好聲音
混血兒唱《愛是永恒》封歌後
■Mariam唱歌時聲音雄渾，字正腔圓，仲好有台風。
國泰航空（293）有靚空姐之外，原來仲有靚聲歌後。話說國泰每年都會舉辦員工歌唱比賽，今年去到第20屆，奪冠嘅國泰機艙事務長Mariam Razviz雖然係混血兒，但唱國
語同廣東歌都好掂，仲有些少杜麗莎feel㖭呀。
國泰下星期專登為Mariam搞咗個傳媒聚會，佢仲打算即席獻唱兩首歌。華華好奇走去YouTube睇嚇佢係咪真係咁唱得，睇番佢今年9月參加國泰歌唱比賽，佢外表鬼鬼哋，竟然唔係唱英文歌，而係唱張學友嘅《愛是永恒》，仲有台灣歌手黃小琥嘅《沒那麼簡單》，佢聲音雄渾，字正腔圓，仲好有台風，難怪輕易奪冠。
任職國泰機艙事務長嘅Mariam，係香港出世嘅混血兒，精通英文、國語同廣東話，所以叫佢唱曬3種語言嘅歌曲都難唔到佢。
■國泰內部刊物都有報道Mariam在歌唱比賽中奪冠。 10年前參賽 一鳴驚人
其實今次係佢第2次參賽，第一次要講番10年前，當年有位朋友搵佢做伴參加，結果佢就一鳴驚人，呢個橋段十足十啲女仔搵人陪選港姐，結果係個朋友得冠軍咁樣。
聞說，公司嘅專業評審覺得Mariam唱得太好，為免影響其他同事嘅參賽機會，佢首次得獎後，就勸佢唔好再參賽。事隔10年，今年Mariam想再玩嚇，感受台上唱歌嘅感覺，於是唔理咁多，報名參賽，9月喺理工賽馬會綜藝會出戰時，輕易再成為歌後！
Mariam唱《愛是永恒》片段：http://bit.ly/1QxATPP
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
