摩笛有「景轟」
2015年11月13日
有「摩笛」之稱的摩根士丹利發表報告，突然唱好港股，認為喺摩根士丹利指數(MSCI)中，香港指數落後其他亞洲地區，預計未來可以追上，故此看好港股表現。港股連跌幾日後，撞着呢曲摩笛唱好，即使內地股市微跌，港股仍借勢大幅爆上536點。
炒番轉SDR
大摩今年
大部份時間唱淡中港股市，今次唱好香港，聽落有點「怪調」，今次該行睇好港股論據係過去大摩香港指數喺加息時，表現都會好過其他新興市場，故此將香港排名由全球15上調到第5，建議增持。
大摩話過去香港喺加息時表現好過其他新興市場，故此叫買港股，但諗真新興市場喺美息上調全部跌到一仆一碌，所以香港表現好少少，無咁衰，係唔係值得入貨的理由呢？尤其香港係地產主導的經濟，加息不利樓市係人都知啦，所以陸羽仁估計，呢曲「怪調」聽落有「景轟」，我懷疑港股回一回後，外資又翻頭入來炒一轉人民幣加入國基會特別提款權(SDR)的消息。
國基會一直無公佈商討人仔加入特別提款權的細節，連開會日期都未正式公佈，傳聞是11月30日拍版。人仔有機會加入作特別提款權貨幣咁重要的消息，大行無理由唔上下其手炒炒佢。如果咁計，大摩家唱好，時間咪剛剛好囉。
食住魔笛唱好個勢，好友乘機發難夾爆淡倉，港股昨日高開125點報22477點，午後買盤大量湧入掃高個市，一度急飆超過六百點，恒生指數收報22888點，飆升536點或2.4%；國企指數收報10408點，漲163點或1.59%，成交金額由昨日725.6億元，增至792.93億元。一口氣收復十天(22692) 及二十天線(22849) 收市。
友邦(1299) 、騰訊(700) 及中移動(941) 為升市火車頭，合力推高恒指175點。友邦收造48.45元，升3.75%；騰訊升2.31%，造155元；中移動漲3.21%，報93.15元。
個市回彈，好多股份都造好，個別有好消息的股份彈得仲勁。好似陸羽仁之前估佢賣物的安全倉(237) ，公佈出售柴灣貨倉套現15億元，股價即刻彈上14.6%，收16.96元。市場原先估計佢會賣葵涌個倉，點知傾一輪無結果，後來有人斟柴灣個倉反而成事，一舉出售套現。由於今次賣物業等如每股套現11元以上，相比安全倉17元的股價比例好大，公司又全無負債，外界估佢會大派特別股息，所以股價彈上。
安全倉名下有幾個物業，以佢賣一個都套現15億元，雖然帳面資產淨值係26.7億，但估計全間公司資產近40億。安全倉管理層早前話過，家內地大減關稅，對香港零售業實有影響，間接都會削弱倉儲需求，不過生意難做，賣資產就好值錢。如果佢唔再做倉，將名下物業套現，計落都幾和味。
賣殼售產與眾同樂
類似安全倉的舊經濟公司其實唔少，關鍵係點樣發掘出來同埋吼準落注機會。家有好多有工業地的公司，他們將名下物業重建，由於折舊關係，收租都未必可以係損益帳上好處，變成高資產、低盈利。有人話好多呢類公司得十億、八億市值，家內地股市雖然插低，但好多人仲有興趣借殼上市，
一個上市地位仲值5、6億元，如果大股東賣殼套現，同小股東分水，自己袋番部份資產落私人手，隨時好過坐喺度，唔知他日殼價仲值唔值錢！實際上，有唔少大股東都計緊呢條數，但點搵到呢類公司，就要眼光加彩數啦。
好似做玩具的開達集團(180) ，市值7.4億，資產淨值16億，早幾前傳過新世界以20幾億買佢九龍灣的廠房，但公司否認。呢啲股主業不吸引，若佢揸住物業唔賣，你真係等幾年等到發毛，但一旦賣股，就認真襟計，不確定性好大，所以好蝦人買。
陸羽仁
金融High Tea 舊文
