魚樂無窮：股價企硬的遐想
■鱷魚恤昨收報0.96元。 資料圖片
港股再次啟動悶爆mode，成交唔夠，波幅欠奉，睇嚟要等儲局12月落實加息後，各路英雄先會有新部署。未來一個月，好大機會係炒股唔炒市格局，你睇數字王國（547）單日有2億成交，就知有幾墟冚。爬格仔亦有好玩嘅地方——只要市
場受落，一個小小概念，都會無限放大，噚日推介嘅中華國際（1064）如是，今日相中嘅鱷魚恤（122）如是。
今年2月，鱷魚恤宣佈大股東林建名，與獨立第三方洽售所持50.46%公司股權，消息一出，股價一度炒至1.99元，累積升幅2.7倍，快過印銀紙，雖然6月宣佈磋商終止，但股價出奇未有大散，只是7月8日股災最恐慌一刻，曾經重回起步點，其後一直呈強，以最新價0.96元計，較宣佈賣盤前仍高近八成。
點解咁硬淨？不外乎兩個原因︰一、賣盤消息一不離二。林建名七十八歲，最愛享受人生，喺娛樂版曝光率多過財經版，大膽假設子女不接手生意，易手似乎是公司唯一出路。二、底子夠厚。公司手持中港多項物業，包括位於觀塘核心區嘅鱷魚恤中心，近日先後有商廈易手，有價有市也，以每股NAV1.65元去秤，現價大平賣。事有湊巧，與鱷魚恤關係密切嘅麗新發展（488）剛宣佈供股，鱷魚恤呢個時候再有動作，絕對唔應該驚訝。
唐牛
https://www.facebook.com/tongcow88
唐牛
魚樂無窮 - 唐牛 舊文
