笑到最後：台灣大選與港股
■香港如果無民主，市場只會由賺快錢主導。圖為當選台灣總統的蔡英文。 美聯社
全靠A股股災，同樓市脫鈎多年嘅股市，終於再次掛鈎，一齊急跌。點解樓市跌得咁急，主要係回應番對上幾年因政策乾升，𠵱家掉轉頭乾跌，因為已經寫過好多次，所以唔再重複。今日反而想講點解恒指自2009
年會唔跟樓市走勢，恒指癡癡呆呆橫行咗七年。
香港樓市自金融海嘯後升咗七年，除咗話熱錢平息之外，主要原因係經濟好。2011年以後失業率都維持3.5%以下，薪金持續上升，雖然追唔上通脹，但對比外圍，美歐日一齊倒退，薪金係倒退到零──失咗業，香港經濟已經係超好。咁嘅經濟背景下，正常反映國家經濟嘅股市，就算冇領先經濟上升，至少都有接近類似牛市表現，可惜港股冇。
可能好多人會話，恒指引入咗好多中資股，令主要藍籌股失去動力。過去幾年長升的藍籌股只得一隻騰訊（700），中間倍升過唔係冇，例如濠賭、新世界（017）、港交所（388），但之後都打回原形，亦都被匯控（005）同內銀之流拖累。
近年流行一句話：自己香港自己救。如果有足夠嘅港資企業充撐場面，指數亦都冇必要無限引入中資企業，就係因為冇，所以恒指先充斥住中資股。恒指多中資股拖累，所以股樓脫鈎，係結果唔係原因。
亦都有話香港經濟體系細，養唔到大生意。但新經濟已經係全球生意，冇所謂國界，諗到就做到。就算科網唔夠美帝勁，實體生意都可以做到好大，例如時裝，歐洲有Zara、日本都有Uniqlo，幾十年前香港成衣係世界第一，思捷（330）曾經係當中極致，但近十年香港都係交白卷。
無民主無安全感 只想賺快錢
香港一向都係一個移民城市，搵夠上岸一詞，或多或少有移民意味。香港政權移交中國後，一直唔能夠令香港人建立安全感，反而一年比一年差，個個都諗住賺快錢移民，全副心思去曬物業、啤殼賣殼，大家齊齊賺快錢，冇人願意長線投資，所以十幾廿年港企生意冇發圍，只得地產獨大，指數公司見本地冇大企業，咪擺大陸公司入去，結果香港股市好離地，同香港冇乜關係。
無論香港啲商人把口幾愛中國，床下底本護照，都係歐美國家護照，證明有民主，令大家安心啲。就好似長和（001）主席李嘉誠2012年講過，「投資國家傾向選民主國家，因有法律保障」，倒返轉諗，如果香港有民主，唔使山長水遠去外國，呢類長遠少少嘅資金同生意，或者會願意留喺香港發展落去，而唔係純炒樓玩財技。
高明都唔信香港有民主後一切會變好，但或者有一線生機；唔行呢步，香港即使捱過今次中國經濟危機，都係會由賺快錢主導，炒樓啤殼，再次輪迴。適逢台灣總統大選完結，呢個問題，我畀返大家思考。
高明
https://www.facebook.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
